«Йиз багъри гъул» конкурс

Гьарсар касдин рякъ чан бицIи ватандилан ккебгъру. Йиз бицIи ватан багъри ГьепIил гъул вуйиз! Думу бицIиб вушра, лап уччвуб ву. ГьепIил гъулан табиаьтдихьинди гъилигиган, ул абцIрадар. Саб тереф ву дагълар, тмуну тереф кIуруш – яркврар. Гъулан гъирагъдихьан мина жабгъура Рубас нир. Пагь, фукьан уткан дарин думу! Дина учу хьадну гъягъюри шулча.

Йиз гъулаъ бицIидарин багъ, мист, туканар, медпункт, библиотека ва М.Рахметовдин ччвур али мектеб а. Душваъ гизаф ужудар мялимар лихура. Аьхю чухсагъул пуз ккундузуз дурариз.

Йиз гъуландар лап албагдар ву. Читинвалар гъахьиш, дурар саб гаф дапIну, кюмекназ уч шулу. Гьар касдиз аьхюр-бицIир аьгъювал, йиз фикриан, йиз гъулан варитIан аьхю девлет ву.

Инсанарин яшайишра ужуб ву. Гьарсаб хулаъ мани, мичIли шид, газ ва акв а.

Йиз фикриан, ГьепIил гъул варитIан уткан ва гюрчег йишв ву! Аьхю умуд кайиз, йислан йисаз думу хъана гюрчег хьибди, кIури.

КкудубкIуз ккундузуз йиз ихтилат М.Митаровдин гафариинди:

Наан узу ккунивалкан
Гаф гъапIишра, вуйиз увкан.
Ув’инди вуйиз рюгь уткан,
Йиз аьшкь, гьевес,
Табасаран!