Июндин 20-пи йигъан Урусатдин Федерацияйин Президент Владимир Путиндихъди вуйи «прямая линия» гъябгъюрайи вахтнаъ, БотIлих гъулан агьалйир гьюкуматдин кIулиъ айирихьна 1999-пи йисан августдин-сентябрин вазари Дагъустандиин алжагъу бандитарихъди женг дубхну, дурар багъри ругарилан терг гъапIдариз Кафари Кавказдиъ гъушу дявдин иштиракчйирин ихтиярар тувну адрувалин гьякьнаан аьрзар апIури илтIикIнийи.

Владимир Путинди Кафари Кавказдиъ бандитарихъди чпин хушниинди женг гъубхдар дявдин гьяракатарин ветеранариз барабар апIувал табшурмиш гъапIнийи.

Июлин 23-пи йигъан Госдумайи чан заседаниейиъ 1999-пи йисан бандитарихъди женг гъубху дагъустанлуйириз ветеранарин ихтиярар тувбан гьякьнаан вуйи къанундин проект аьхиримжи, шубубпи урхбаъ кьабул гъапIну. Документди дурариз гьар вазли пулин кюмек ва жара рягьятвалар гъадагъуз ихтияр тувра. Му теклифнан автор депутат – единоросс Умахан Умаханов гъахьну.

Дагъустандин Глава Владимир Васильевди му къанун кьабул апIбаз ухдихъан мина учв ккилигурайиваликан гъапну. «Дагъустандиъ варихалкьарин яракьлу духьнайи бандитар архьну 20 йис тамам хьайиз цIиб вахт ккимиди уьлкейин Президентди дугъривал чан йишв’ина гъабхьну. Ихь республикайин агьалйири багъри ругар ва Урусатдин сабвал уьбхбан бадали чпихьан шлуб вари гъапIну. Дидин гьякьнаан ихь гизаф миллетарикан ибарат вуйи аьхю уьлкейин вари агьалйири кIваинди гъибтну ккунду», – къайд гъапIну В.Васильевди. Дугъан гафариинди, Дагъустандин ополченцйирин месэла гьял апIури гизаф вахт вуйи. «Аьхирки, ихь ополченцйириз, БотIлихдин, ЦIумадайин, Новолакдин женгариъ иштирак гъахьи агьалйириз му важиблу ччвур тувну», – гъапну региондин главайи.