Гъубшу гьяфтайиъ РД-йин Глава Владимир Васильевди ихь машгьур шаир Гюлбике Уьмарова Расул Гьямзатовдин ччвурнахъ хъайи премия тувбиинди лишанлу гъапIну. Му мялумат учу «Табасарандин нурар» газатдин 30-пи нумрайиъра ва газатдин вари социалин сетариъра тувбалан кьяляхъ, хайлин ихь ватанагьлийирихьан Гюлбике Уьмаровайин уьмрикан, яратмишарин рякъкан, аьхиримжи йисари дугъан кьалмиккан ккудучIву эсерарикан суалар гъюз хъюгъну. Учу гьаму йигъари дугъахъди гюрюшмиш гъахьунча, ва шаири учву учухьна хътау суалариз аьхю аьшкьниинди жавабар тувну.
Гюлбике Уьмарова 1960-пи йисан Хив райондин Гъвандикк гъулаъ бабкан гъахьну.
Гьевескарвалин рякъюъ Гюлбике Уьмарова хабарсуз инсан дар. Чан вари уьмур дугъу багъри табасаран ва дагъустан литературайин артмиш’вализ бахш апIура. Гюлбике Уьмарова Гъвандккарин Гьяжикьуттайин тухмарин вакил ву. Ич сюгьбатнаъ шаири чаз сабпи дарсар киву Гъазимягьмад Аьлимягьямадов, бабан чIал дериндиан ккун хьуз гъиту Гьясанбег Сефербегов, ужуб тербия ва насигьят туву Агъамягьямед Уьмаров, урус литература киври гъахьи Мегьрихан Мягьямедханова ва жара гьюрматлу мялимар кIваин гъапIну. Гьадрарин регьберваликкди сабпи шиърарра дикIуз хъюгъну. Райондин газатдиъ чан шиърар чап гъапIхъан, багъри чIалнахьна вуйи ккунивали дугъан уьмур шиърарин халачаси ккабалгну.
1989-пи йисан Москва шагьриъ М.Горькийин ччвурнахъ хъайи Литературайин институт ккудубкIну, Г.Уьмарова багъри ватандиз кьяляхъ гъюру ва Дагъучпедгиздиъ ляхниъ дийигъуру.
Гюлбике Агъамягьямедовнайин шиърар «Табасаран-дин нурар», «Октябрин акв» газатариъ, «Дагъустан дишагьли», «Ппази» журналариъ, «Литературайин Табасаран» альманахдиъ, «Деврин табасаран поэзия» антологияйиъ, табасаран шаирарин сатIиди вуйи гъварчарин китабариъ чап дапIна. Гъийин йигъаз 20-тIан артухъ бицIидаризна аьхюдариз вуйи эсерарин китабар чапдиан удучIвна.
«Багъри бабан чIалниинди узу гизаф китабар чапдиан адагъназа. Гьадрарин арайиъ узу урус чIалнаан таржума гъапIу А.Пушкиндин «Евгений Онегин», Расул Гьямзатовдин «Йиз Дагъустан», Льюис Кэрролин «Алиса аьламатарин вилаятдиъ» китабарра а.
Хъа гьамрар арайиз гъяйиз узу «ЧIалнан ядигар» (2016) кIуру китаб гъибикIунза. Думу Бейдуллагь Ханмягьямедов кIулиъ ади ихь багъри грамматика, табасаран литература арайиз гъабхи, дидиъ чпин ччвурар гъиту аьлимариз, мургу баяриз, шаирариз бахш вуди дибикIнайиб ву. Думу китабдиин узу гизаф гъилихунза», – гъапну Гюлбике Уьмаровайи.
Аьхиримжи йисари Гюлбике Агъамягьямедовнайи бицIидариз вуйи литература артмиш апIбан рякъюъра баркаллу зегьмет зигура.
«БицIидариз бабан чIал аьгъдар кIуру гафар кми-кмиди ерхьури шулхьуз. Узу мидихъди рази дарза. БицIидариз гьадмукьан ужуйи чIал аьгъя, иллагьки гъулариъ! Узу мектебариз гъягъруган, гьаммишан бицIидар фикриъ шуйиз. Гъи дурарин хилиъ китабдин ерина телефнар айивали юкIв сикинсуз апIуру. Узу ихь бицIидариз бахш вуди «Телизенг» кIуру китаб гьязур гъапIнийза. Учву вари рази апIури, хабар тувуз ккундузуз: «Телизенг» 19 чIалназ илтIибкIну. Ва думу саб ихь табасаран чIал апIру бицIидари ваъ, багарихьди 19 жюрбежюр чIалариинди бицIидари урхиди. БицIидар, гъюз имбу наслар бадали лихруган, чIалнан, дидин зиин лихурайидарин, урхурайидарин хъуркьуваларра арайиз гъюру», – гъапну Гюлбике Агъамягьямедовнайи.
Аьхиримжи вахтна Гюлбике Уьмаровайи кьюб китаб чапдиз тувна: бицIидариз вуйи «Кьунацйир» ва аьхюдариз «Шюшесиб манзил».
Багахь гележегдиъ думу китабари ихь багъри литература хъана девлетлу апIур кIури, миж киври, Гюлбике Уьмаровайиз жандин сагъ’вал, хушбахтвал ва кIван шадвал ккун апIурача.
