Аьхиримжи вахтна республикайин машинар хъаъру рякъярихъди хъайи шалмнарик, аварйир дархьбан, рякъюъди гъягъюрайидари къанундин къайдйир уьрхбан бадали, республикайин рякъяриъ машинар хъаърайидари апIурайи къайдасузвалар ва деетурайи хатIйир видеойиз адагъурайи хайлин видеокамерйир кивна. Амма, гьаци вушра, йигълан-йигъаз рякъяриъ шулайи хатIа-балйирин кьадар кам шуладар. Саки гьар йигъан республикайин рякъяриин швнуб-саб аварйир шула.

 

РД-йин ГИБДД-йиан учуз туву мялуматариинди, магьа гьаму гъябгъюрайи августдин вазлин эвелиан мина республикайин аьтрафариин 82 аварйир духьна. Натижайиъ 21 кас гъийихну, дурарикан 14 бицIир ву. Хъа зийнар гъахьидарин кьадар 118 кас ву. Гьаму вазлин арайиъ гъахьи варитIан аьхю аварйирикан саб – 12-пи августдиъ Астрахандиан Мягьячгъалайиз гъюру рякъюъ гъабхьи авария ву. Думу аварияйиъ иномаркайихъ хъайи водители чан машин рякъюн къаршу терефназди адапIбан ва рякъюн думу терефнаан зарбди гъюрайи машиндихъ йивбан натижайиъ 4 инсан гъийихну. Сабсана гьациб аьхю авария Къумтуркъала райондин аьтрафариинра гъабхьну. Думуган сабуну машиндихъ хъайири, жара касди хъапIрайи машиндинна чан машиндин арайиъ гъубзрайи манзилназ фикир тутрувди, бедбахтвалин дюшюш арайиз гъюз гъитну. Натижайиъ му-шваъра 4 кас гъийхну, хъа учв машин хъапIрайир, гъагъи зийнар духьну, больницайиъ ккаъна.
Ухьу, гьюрматлу ватанагьлийир, гьаммишан кIваинди гъибтну ккунду, рякъюъди машин хъапIбан, гъягъбан къайдйир уьрхювал ухькан гьарурикан асиллу ву. Хъа рякъюъди гъягъбан къайдйир гьарсар касди, журум апIуру кIури ваъ, хъа жара касдиз зарар тутрувбан, думу уьмрихъ мягьрум дарапIбан бадали, дюрхну ккунди.