Гъюру йисан октябрин вазлиъ Урусатдиъ яшамиш шулайи ватандашарин кьадар ахтармиш апIру 12-пи пересписдин серенжемар гъахпахьна гьамусмиди гьязур шула.

 

Думу серенжемарин сяргьятариъди вари Урусатдин халкьдин перепись гъабхуз хусуси вуди яратмиш гъапIу «ВПН-2020» медиаофисди ляхин апIуз хъюбгъна. Дидин метлеб – уьлкейин ватандашариз ВПН-дин дахилнаъди социалин сетариан мина гъахру серенжемарикан вахтниинди мялуматар тувувал ва СМИ-йихъди сатIиди ляхин гъабхувал ву. «ВПН-2020» медиаофисдин официалин сайт 2019-пи йисан аьхирариъ гьяракатнаъ ипди.

Росстатдин кIулиъ айи Павел Малковдин гафариинди, агьалйирин перепись цIийи къайдайиинди гъабхувал гъийин деврин чарасузвал ву, ва диди цIийи рякъяр ишлетмиш апIувал тIалаб апIура.

Уьлкейиъ гъабхру переписдин серенжемарихьна Табасаран ва Хив районарра улихь ккимиди гьязур шула.

Гъябгъюрайи йисан август вазлин 15-пи йигълан 14-пи сентябриз Табасаран райондин аьтрафариин али вари гъулариз 22 пишекар регистраторар гъягъюра. Регистраторарихь паспорт, Росстатдин шагьадатнама ва маршрут кайи кагъзар хьади ккунду. Регистраторари гъулариъ айи хуларин, хулариъ яшамиш шулай касарин кьадар ахтармиш апIиди ва Росстатдин гьисабназ гъадагъиди.

Гьамусяаьт Табасаран райондиъ переписдин месэлйир гьял апIбаан вари ихтиярар айи вакил ва жюрбежюр ме-сэлйириз лигру инструктор лихура. Дурарихьна, 8(938)984-83-59 телефондин номериз зенг дапIну, илтIикуз шулу.

Август вазлихъан мина башламиш дапIну, му ляхин Хив райондиъра гьяракатнаъ ипна. Хив рйондиъ лихурайи пишекар регистраторари, чпин улихь дивнайи асас вазифа кIулиз адабгъбан бадали, райондиъ яшамиш шулайи кIулди вари агьалйир гьисабназ гъадагъувал тямин апIуз, муниципалин образованиейин дахилнаъ айи вари гъулар, гъулариъ айи кючйирин ччвурар кайи табличкйир, хуларик нумра улупру табличкйир каш, ахтармиш апIуру.