Гьаму йигъари Хив райондиъ Дагъустан Республикайин Халкьдин Собраниейин депутат Марат Аслановдин ччвурнахъ хъайи пешкешариз вуйи волейболин турнир кIули гъубшну.
Турнир ачмиш апIури, сифтейин гаф кIулин судья Фахрудин Рамазановди гъапнийи. Дугъу чан улхбаъ, цIар ккадатури, турнир 1999-пи йисан дагъустандиъ гъахьи гьядисйир, кчIихбар ккудукIну ва ихь терефназди гъалибвал дубхьну, 20-йис тамам хьпаз бахш дапIнайиб вуйиваликан мялум гъапIнийи. «Гьюрматлу уч духьнайи 6 команда ва тамаши апIуз дуфнайи касар, ухьу гъийин ихь турнир, саб улхубрахубра адарди, баркаллувалиинди кIули гъабхуб лазим ву. Йиз кюмекчи судйирра хъади, учву вари йиз дюзди гъавриъ шул дупну, умуд кивраза. Гъит, варитIан дирбаш, кIубан ва гьязур дубхьнайи командайин десте гъалиб ибшри. Гьамус учву йиз кюмекчи судйирихъди ва турнириъ иштирак шулайи 6 командайихъди таниш апIидизачву.
Судйир: Аьликъулиев Керим Аьликъулиевич, Загьиров Гьямзат Султанович, Исаев Умудин Жамалович.
Турнириъ иштирак шулайи 6 команда кьюб жергейиз жара дапIназа. Сабпи жерге: Хирижв, Кошкент ва Яракк; кьюбпи жерге: ГъуштIил, Хив ва АрхъитI. Ухьуз финализ 4 команда лазим ву, гьаддиз ухьу 4 команда финалин талитназ гъядягъбан сабпи тур гъабхидихьа. Тамашичйир, учвура кьимат дивай», – гъапнийи дугъу. Сабпидар вуди талитназ Хирижв ва Кошкент гъуларин волейболин командйир удучIвнийи, гъалибвал Хирижв командайи гъадабгънийи. Хъа турнир ГъуштIларин ва Хиварин командйири давам гъапIнийи, ва талитнаъ ГъуштIил гъулан команда гъалиб гъабхьнийи. Хъасин тамашичйири Хирижв ва Яракк гъуларин командйириз тамаши гъапIнийи, му талитнаъра Хирижв гъул заан гъабхьнийи. ГъуштIларин командайихьан АрхъитI гъулан командайиин гъалиб хьуз удукьнийи. Яракк ва Кошкент командйирин талитнаъ Кошкент гъалиб гъабхьнийи. Сабпи турин аьхиримжи талитнаъ АрхъитI гъулан команда Хиваринубдиин гъалиб гъабхьнийи.
Сабпи турин кьяляхъ 4 команда финализ гъузнийи, хъа Хиварин ва Асккан-Ярккарин командийир финалиъ иштирак дархьуз къарар адабгънийи.
Финализ тамаши апIуз райондин администрацияйиан, образованиейин цирклиан ва хъана жара хялар гъафнийи. Дурарин арайиъ Хив райондин глава Ярмет Ярметов, СССР-ин оборонайин Министерствойин пенсионер Гьяжи-агъа Ибрагьимов, бизнесмен Хидирнеби Асланов, райондин образованиейин методикайин кабинетдиз регьбервал туврайир Назаряли Тарланов, «Хив райондин жегьилар» ДРОО-йин регьберди кадагънайи Мустафа Сеферов ва жара касар айи.
Финалиъ шубубпи йишв бадали ГъуштIил ва Кошкент командйирин арайиъ талит гъабхьнийи, ва шубубпи йишв ГъуштIил гъулан командайи гъадабгънийи.
Сабпи йишв бадали АрхъитI ва Хирижв гъуларин командйири талит гъубхнийи. Сабпи йишв АрхъитI гъулан командайиз гъабхьнийи. Хъа кьюбпи йишв Хирижв командайин кьисмат гъабхьнийи.
Турнирин аьхириъ Ярмет Ярметовди гаф гъапнийи. «Саб гъапиб, ихь халкьдин депутат вуйи Марат Асланов кIулиъ ади, турнирин вари миди вуйи тешкилатчйириз, судйириз ва тамашичйириз чухсагъул. Кьюб гъапиб, гьамциб жанлувалиинди, баркаллувалиинди ихь гъийин турнир кIули гъубху учвуз чухсагъул. Учву вари, туринириъ иштирак гъахьи командйир, гучI дарди мушваъ иштирак хьувал сабпи йишвар гъадагъбакан гьисаб ву! Узу сабсана ляхниин гизаф шад вуза. Ихь райондиъ ата-бабйирилан мина сир-мясляаьт ади яшанмиш шулайи кьюбиб халкьарин арайиъ айи гьякь-гьюрмат гьамци марцциди ухьу уьбхюрайивалиин. Баракаллагь ва баркаллагь, гьюрматлу иштиракчйир, учву гьамци хил-хилиз, гъюн-гъюниз йивну, сарин гъалибвалиин тмунур рази хьпаз!» – гъапнийи Ярмет Аьлиметовичди.
Сабпи йишван диплом, кубок ва 20-агъзур манат пул айи конверт АрхъитI командайиз, кьюбпи йишван грамота ва 15-агъзур манат пул айи конверт Хирижв командайиз, шубубпи йишван грамота ва 10-агъзур манат пул айи конверт ГъуштIларин командайиз тувнийи.
Мидланра савайи, тамашичйирин фикриз ва кьиматназ лигну, саб десте иштиракчйиризра грамотйир ва пешкешар тувнийи. Командайиъ варитIан аьхю яшнан иштиракчиси Фятяли Нурмягьямедов (59-йис, ГъуштIил гъул), командайиъ варитIан жигьил иштиракчиси Имам Гьясанов (15-йис, Кошкент гъул), варитIан ужур кIакIначиси Чингиз Исаев (Хирижв гъул), командайиъ лап дирбашурси Эльнар Гьямзатов (Архъит гъул), иштиракчйирикан варитIанна дирбашурси Артур Нурмягьямедов (Гъуштил гъул) гьисаб гъапIнийи.
Гъит, райондиъ мицдар мясляаьтнан талитар гизаф гъайихри ва райондин агьалйирин арайиъ ислягьвал, гьякь-гьюрмат артухъ ибшри.
