Дагъустан Республикайиъ Мялуматаринна культурайин координационный центр (ИКЦ) абццну, цци 3-пи йис шула. Ихь ватанагьли Сабина Къурбанова думу центрин кIулиъ айирин заместителди лихурира шубудпи йис ву.
Улихьна йигъари Сабина Къурбанова «Табасарандин нурар» газатдин редакцияйиз гъафнийи ва чан ляхникан, республикайиъ гъахурайи чпин серенжемарикан ктибтнийи.
Къайд апIуз ккундучуз, Сабина региондин «Аьжалсуз полк» тешкилатдин кIулиъ айирин заместителра ву.
Сабинайин гафариинди, республикайин Мялуматаринна культурайин коор-динационный центрин асас вазифйир экстремизмдин ва терроризмдин идеологияйиз къаршу мялуматариинди профилактикайин ляхин гъабхувал, мялуматаринна культурайин серенжемар тешкил апIувал, Интернетдиъ медиамайднариъ Дагъустан Республикайин ад за апIувал, республикайин гьюкмин органарин вакилариз Дагъустандин гьякьнаан вуйи мялуматарикан вахтниинди хабар тувувал ва гьацира жарадар ву.
«Учу швнуб-саб аккаунт тешкил дапIнача. Фицики, гъийин девриъ инсанар мялуматариинди маракьлу апIуз гъагъиди ву. Гьаддиз ич сайтдиъ учIву гьарсар касдихьан лазим вуйи рубрикайин чаз маракьлу мялуматарихъди таниш хьуз шулу. Улихьди ихь республикайин агьалйир жюрбежюр телеканалариан вая газатариан мина мялуматарихъди таниш шуйи. Гъи девир дигиш гъабхьну. Фунур-вушра касди интернетдин майднариъ (Фейсбук, ВК, Одноклассники, Инстаграм ва гь.ж.) чан хусуси аккаунт абццну, гьадушваъ чан аудитория уч апIура, дурариз маракьлу фициб-вушра мялумат тувра. Бязиган дицисдар сайтариан туврайи хабрар гьякьлударра вуди шулдар. Гьаддиз гьякьлу мялуматарикан ебхьуз ккунидар, хусуси касарин ваъ, хъа гьюкуматдин дахилнаъ айи сайтариъ учIвну ккунду», – къайд апIура Сабина Къурбановайи.
«Аьжалсуз полк» тешкилатдин региондин отделениейи гъабхурайи ляхникан ктибтури, Сабинайи мялум гъапIганси, дурар гъюру йисан улубкьру, Ватандин Аьхю дяви ккудубкIну, 75 йис хьпан юбилейихьна гьязур шула. «Учу гьар йисан аьдати агьалйирин арайиъ дурариз варитIан ккуни машкврарин гьякьнаан гьерхбар гъахури шулча. Аьхюну пай агьалйири гьаммишан «Гъалибвалин Йигъ» машквар ктабгъуру. Гьаму йисан учу мектебдиъ урхурайидарин арайиъ Ватандин Аьхю дявдин иштиракчйириз бахш дапIнайи конкурс тешкил гъапIнийча. Душваъ 10 агъзуртIан артухъ баяр-шубар иштирак гъахьну. Дурари дявдиз гъушу чпин абйирикан, халйирикан, мирасарикан, багахьлу касарикан гъибикIнийи. Му тарихи ахтармишарин ляхниз ухшар вуйи ужуб конкурс гъабхьну. Натижйир гьеле дивнадарча», – ктибтура Сабина Къурбановайи. «Аьжалсуз полк» тешкилатдин серенжемарин гьякьнаан дугъу гъапиганси, полкнан жергейиъ дийигъуз ккунидарин кьадар йислан-йисаз артухъ шула. Мисалназ, Мягьячгъала шагьрин асас майдандиин полкнан жергйир дерккра. Инсанарин жергейин кIулиъ айидар серенжем гъабхру асас йишв’ина рукьруган, дидин аьхириъ айидар майдандилан улдучIвнадитIан шулдар. Яна ихь рякъяр, майднар, паркар мукьан гизаф кьадар инсанар сатIиди уч апIуз мумкинвал айидар дар. Гьаддиз ихь рякъяриъ, паркариъ мицдар серенжемар тешкил апIруган ва кIули гъахруган, гизаф читинвалар арайиз гъюру. Эгер цифрайикан улхуруш, 2019-пи йисан кIулди Дагъустандиъ «Аьжалсуз полкнаъ» 300 агъзуртIан артухъ агьалйир иштирак гъахьну. Гъюру йисан думу кьадар хъана артухъ хьибди. Мушваъ жараси хьубра мумкин дар, гьаз гъапиш Дагъустан Республикайиъ Ватандин Аьхю дявди хизандиан вакил талаф дарапIу ясана дидин аьрвалар дярякъю кас адру хизан абгувал лап читин ву. Гьаддиз йислан-йисаз «Аьжалсуз полкнаъ» иштирак’вал апIурайи агьалйирин кьадар артухъ хьувал думу дявдин иштиракчйириз гьюрмат апIувал ву.
