Дагъустан – культурайин ядиграрихъди гизаф девлетлу йишв ву. Республикайин аьтрафариин 8,7 агъзуртIан артухъ тарихдин ва культурайин ядиграр ерлешмиш духьна.

 

Эгер му ядиграриз асас фикир тутрувиш, йислан-йисаз дурар чIур шулу. Аьхиримжи йисари культурайин девлетар уьрхбаз гьюкуматдин терефнаан ужуб кюмек апIура.

Дербент шагьриъ айи Нарын-Гъала – му ЮНЕСКО-йин къарарниинди вари дюн’яйин ирснан ядигар вуйивалин ччвур тувнайи, жара гьич саб йишваъра адру жюрейин тарихдин ядигар ву. Думу уьбхювал, гьюкуматдинси, ихь вари халкьдинра буржи ву.

Августдин 27-пи йигъан Дербент шагьрин музей-заповедникдин бинайиинди шагьрин культурайин девлетарин объектариин террористарихьан хатIасузвал тямин апIбан месэлйириз бахш дапIнайи заседание кIули гъубшну. Совещаниейиъ удучIвну гъулху музейин директор Аьли Ибрагьимовди, терроризмдиз аьксивал улупбан профилактика гъабхру экспертар Мурадхан Рабадановди, Шовкет Жаватовди ва жарадари, хьадан вазарин вахтна культурайин дараматариина гизаф халкь гъюрайивалихъди аьлакьалу вуди, хатIасузвал тямин апIбан месэлйир учIруди дийигънайиваликан гъапнийи.

Музейин директори къайд гъапIганси, Нарын-Гъалайиъ гизаф видеокамерйир дивну ашра, дараматдин вари терефариз лигуз мумкинвал адар. «Гьаддиз гъаравулвал гъабхурайи гъуллугънан пишекрари мугъаятвал дюбхну ккунду. Дурари ляхин апIури ашра, музейин отделарин кIулиъ айидариланра жавабдарвал алдабгъурадар, дурарира чпин йишвариин дикъатлувал дюбхну ккунду», – гъапну Аьли Ибрагьимовди.

Дугъу гьацира хатIасузвал уьбхбан дарср кивувал текрар апIбан чарасузваликанра мялумат тувнийи.

Заседание Дербентдин музей-заповедникдиъ хатIасузвал тямин апIбан серенжемар кьабул апIбиинди ккудубкIнийи.