Улихьна йигъари Табасаран райондин глава Мягьямед Къурбанов райондиъ айи 23-пи ПСЧ-йин начальник, айтIан ляхнарин гъуллугънан капитан Акиф Аьлипашаевра ва райондин администрацияйин текилишчивалин ляхнариз лигру жавабдар касарра хъади НичIрас гъулаъ тикмиш апIурайи мектебдин ляхнар фици гъягъюраш лигуз гъушну.

 

Табасаран райондин администрацияйин пресс-гъуллугънаан туврайи мялуматариинди, НичIрас гъулаъ сабпи сентябриз мектеб абццбан бадали, тикилишчивалин вари ляхнар гьяракатниинди гъахура. Гъийин йигъаз мектебдиъ унчIвар, полар, гъваиъккишв гьязур дапIна, электричество дизигна. Яна, саб гафниинди, урхбан цIийи йис ккебгъайиз, дарсар кивру корпусдиъ саки вари ляхнар ккудукIиди.

Райондин глава Мягьямед Къурбановди къайд гъапIганси, му мектеб урхбан цIийи йис ккебгъайиз чарасуз вуди ачмиш дапIну ккунду. Фицики, гъулан бицIидариз йирси мектебдиъ аьгъювалар гъадагъуз гизаф читинди алабхъура. Думу мектеб аварийный гьялнаъ айивализ лигну.

«Гьамусяаьт варитIан асасуб – вари ляхнар заан ерийиъди ва вахтниинди тамам дапIну, мектебдиъ лихурайи мялимар ва душваъ урхурайи баяр-шубар ужудар шартIарихъди тямин апIувал ву. Мебелихъди ва мектебдиз лазим вуйи жара алатарихъди аьлакьалу месэлара гьаму йигъарин арайиъ гьял апIиди.

Мидланра гъайри, багарихьди мектебдин улихь хьайи гьяятра дюз алапIиди», – гъапнийи райондин главайи.

Делегацияйихъди райондиан НичIрас диврайи мектебдиз лигуз душнайи Акиф Аьлипашаевди къайд гъапIганси, душваъ ужуб ерийиинди электричествора дизигна, саб фицIибкIа чIуру гьядиса гъабхьиш, гьялакди эвакуация апIбаз йишварра гьязур дапIна. Дугъан гафариинди, гьелелиг мектебдиъ хайлин ляхин апIузра ими.