Хьадан шубуб вазлин тятIилар ккудукIну, мектебариъ сабпи зенг йивбан шадлугънан серенжемар кIули гъушну. Хив райондиъ сабпи зенг йивувал лап бегьерлуди ккебгъну. Фицики, ццийин урхбан йисахъди аьлакьалу вуди райондин мектебариъ саб хайлин цIийи дигиш`валарра духьна.
ЦIудухъ гъуландариз му йигъан кьюб машквар гъахьну. Саб кIуруб, урхбан цIийи йис улубкьувал, кьюбпиб – гъулан кьялаъ гъийин деврин вари тIалабариз жаваб туврайи, 80 касдиз деъру йишвар айи мектебдин раккнар арццувал. Дагъустан Республикайин «150 мектеб» кIуру проектдик Хив райондиан шубуб мектеб кахьну: Мажвгларин, ЦIийи-Фрюгъярин ва Гъвандккарин. Му проектдиан вари терефарихъан ляхнар гъахбаъ анжагъ саб Мажвгларин кьялан мектеб улихь хьа. Гьелбетда, думу гьунар гьадму гъулан выпускник вуйи, «Уют-строй» ООО-йин кIулиъ айи Манаф Аьгьмедхановдинуб ву. Фицики, дугъу мектебдиз чан терефнаан юкьудварж агъзур манат пул жара гъапIну ва миди вуйи вари ляхнар-карарра чав регьбервал туврайи фирмайиина гъадагъну. Гьацира думу ляхин улихь гъябгъбак, чан мялимарин коллективра хъади, мектебдин директор Анвер Хидировдира аьхю пай кивну. Гъябгъюрайи йисан 20-пи сянтябрихъан Хиварин, Мажвгларин ва ЦIийи-Фрюгъярин мектебариъ «Точка роста» кIуру центрарра тIаъди. Зиихъ улупнайи шуббиб мектебариъра рас апIбан ляхнар лазим вуйи саягъниинди кIули духну, кью-кьюб класс гьязур дапIна, дурар анжагъ ФГОС-дин лазим вуйи алатариз, диллигариз ккилигура. Думу центриъ урхурайидариз ва гъирагъдиланра урхуз ккунидари технологияйиан, информатикайиан ва ОБЖ-йиан аьгъювалар гъадагъуз мумкинвал хьибди. Мидланра савайи, райондиъ ЗахитI гъулан кьялаъ 171 касдиз деъру йишвар ади тикмиш апIурайи мектебдин ва ЦIинитI гъулан спортзалиъ кIулиъ гъахурайи тикилишчивалин ляхнар аьхирихъна гъюра.
Тазади раккнар арццрайи мектебдиз лигуз, расвалин ляхнар кIули гъуху ва давам шули имбу мектебарилан ул илбицуз, мектебарин сабпи зенгнан линейкириъ иштирак хьуз багъри райондиз Урусатдин Дагъустан Республикайиъ айи МЧС-дин министр Нариман Къазимягьямедовдизра теклиф гъапIнийи. Дугъахъди саб жерге хялара хъайи, дурарин арайиъ хайлин йисари райондин главади гъахьи, гьамус Дагъустан Республикайин Гьисабнан палатайин отделин начальникди лихурайи Бейдуллагь Мирзоевра айи. КIваин апIуз ккундузузки, зиихъ улупнайи, тазади ракккнар арццрайи мектеб, пулин дакьатара райондин бюджетдиан жара дапIну, дугъу райондиз регьбервал туври амиди ккебгънайиб ву. Чпин удучIвну улхбариъ дурари ва ЦIудхъарин мектебдин директор Сефижат Наврузбеговайи мектебдиъ урхурайдариз, мялимариз, техработникариз, баяр-шубарин абйир-бабариз урхбан цIийи йис тебрик гъапIнийи ва гъийин девриъ образование вари ляхнар-карарин шибритI вуйиваликан гъапнийи.
Аьхириъ райондин глава Ярмет Аьлиметовичдиз, ООО «Уют-строй» фирмайин кIулиъ айи Манаф Векиловичдиз, ляхин гъапIу устйириз ва гъирагъдилан кюмекнан хил туву касариз, спонсорариз марцци кIваан, «Чухсагъул» мялум гъапIнийи.
Гьелбетда, йислан-йисаз цIийи мектебарин дараматар артухъ шулашра, дурар цIийи авадлугъарихъди тяйин апIурашра, спортзалар тикмиш апIурашра, гьяйифки, урхурайидарин кьадар артухъ шуладар. Мисалназ, 2018-2019-пи урхбан йисан вари Хив райондиъ урхурайидарин кьадар 2471-тIан дар. Хъа дурариз аьгъювалар туврайи мялимарин кьадар 638-тIан дар. (Дурарикан 113-касдиз 1-пи категория, хъа 105-касдиз заан категория а.) Цци урхурайидарин ва мялимарин кьадар хъанара цIиб хьувалиин инанмиш вуза. Фицики, саб хайлин баяр-шубар ЕГЭ-йихьан ул хьайивалиан 9-пи классдихъан урхуз гъягъюра, хъа сабпи классдиз гъюрайдарин кьадар йислан-йисаз цIиб шула. ИкибаштIан, ухьуз варидариз мялум вуйиганси, гъи саб хайлин гъулариъ ляхин адрувализ лигну, жигьилар чпин хизан-кюлфетра хъади шагьрариз кючмиш шула. Му ляхнира гъи мектебариз аьхю тясир апIура.
Йиз макьалайин аьхириъ пуз ккундузузки, гъит, ихь веледар, баяр-шубар наан ашра, фуну йишваъ мектебдиз гъягъюрашра, чпин кIваъ айи марцци мурад-метлебарихъ хъуркьри!
