Гьаму йигъари Мягьячгъала шагьриъ поэзияйин Хулаъ табасарандин машгьур шаир, таржумачи Аьбдурягьим Аьбдурягьмановдин (литературайиъ жвувкан кадабгънайи ччвур Рягьим Рягьман) яратмиш апIбариз бахш дапIнайи мажлис гъабхьну.
Серенжемдиъ уьлкейин машгьур шаирар-таржумачйир, РФ-дин писателарин Союздин секретарь, РФ-дин, Дагъустан ва Чечен Республикйирин культурайин лайикьлу гъуллугъчи «Московский литератор» газатдин кIулин редактор Иван Голфубничий, Брянский областдин писателарин жямяаьтлугъ тешкилатдин председатель, литературайин цирклиъ вари Урусатдин заан премйирин сагьиб Владимир Сорочкин, РД-йин писателарин Союздин председатель Мягьямед Аьгьмедов,Табасаран халкьдин писателар, шаирар ва поэзияйин юкIв али касар иштирак гъахьну.
Серенжем ачмиш апIури, Мягьямед Аьгьмедовди къайд гъапIганси, гьарсаб халкьдиз варитIан багьалуб багъри чIал ву, хъа шаири гьадму чIал уьбхбаъ ва артмиш апIбаъ заан йишв бисура.
Рягьим Рягьмандин шиърар гъийин девриз хас вуйидар ву. Дурари табасаран литературайиъ чпин лайикьлу йишв дибисна. Рягьим Рягьман чан шаирвалин рякъ баркаллуди давам апIурайи инсан ву.
Аьбдурягьим Аьбдурягьмановдин яратмишарикан, дугъан уьмрикан, дуствалин аьлакьйирикан, уч духьнайидариз РД-йин писателарин Союздин табасаран секцияйин кIулиъ айи Сувайнат Кюребеговайи, республикайин «Табасарандин нурар» газатдин кIулин редактор Гюлягьмад Маллялиевди, Дагъустандин халкьдин писатель Шагьвелед Шагьмардановди, шаирар, писателар Гюльбике Уьмаровайи, Кюребег Мурсаловди, Керим Маллаевди, Эльмира Аьшурбеговайи, Аьбдулмажид Къурбановди, Рягьим Рягьмандин гъардаш ва шаир Аьбдуллагь Аьбдурягьмановди, вари халкьарин жямяаьтлугъ Расул Гьямзатовдин фонднан кIулиъ айи Гьябибат Аьзизовайи, табасаран чIалниинди чапдиан удубчIвурайи «Ппази» журналин редактор Феруза Ражабовайи ва жарадари ктибтну.
Иван Голубничийди, Владимир Сорочкинди, Табасарандин гьюкуматдин драмтеатрин актерари Рягьим Рягьмандин табасаран чIалниинди дидикIнайи ва тазади урус чIалназ таржума гъапIу шиърар гъурхну, хъа серенжемдиъ Бикеханум Ражабовайи гъапIу цIийи мяълийири залиъ деънайи тамашичйир лапра гьевеслу хьуз гъитну.
Серенжемдин аьхириъ Рягьим Рягьманди уч духьнайидариз, чан шиърар таржума гъапIу шаирариз, Табасарандин гьюкуматдин драмтеатрин директор Аьлимурад Аьлимурадов кIулиъ ади вари актерариз чухсагъул мялум гъапIну.
