Дагъустандиъ 1986-пи йисхъан мина гьар йисан сентябрин вазлиъ «Лизи кьарнийирин машквар» къайд апIури шулу. Машквриз дициб ччвур вари дюн’яйиз машгьур вуйи шаир Расул Гьямзатовдин «Кьарнйир» кIуру шиъри тувну. Шаирин шиърин цIарар ва мяъли Ватандин Аьхю дявдиъ гъийху эскрариз бахш гъапIнийи. «Лизи кьарнийирин Йигъар» вари Урусатдин ва варихалкьарин важиблу мяна айи машквар ву.

 

Магьа гьаму йисан 8-пи сентбяриъ Социалист зегьметнан Игит, Дагъустандин халкьдин шаир Расул Гьямзатов бабкан гъахьихъан мина 96 йис тамам гъабхьну. Му дюшюшдихъди аьлакьалу вуди Мягьячгъалайиз уьлкейин гизаф пIипIариан хайлин писателар ва шаирар гъафнийи. Республикайиз дуфнайи хялар Расул Гьямзатовдин накьвдиинара дугъан хал-музейизра гъушну. Дурари, шаирин гьюрмат уьбхюри, гафнан гьевес кайи инсанар чпин яратмишарихъди таниш апIури шулу. Гьаму ражарира Поэзияйин Театриъ шаирвалин урхбар гъахьну. Душваъ шаирари, Мягьячгъалайиъ дуланмиш шулайи жигьилари Расул Гьямзатовдин шиърар гъурхну.

Мягьячгъала шагьрин 50-пи нумрайин мектеб машгьур шаир Расул Гьямзатовдин ччвурнахъ хъайиб ву. Му мектебдиъ гьар йисан «Лизи кьарнийирин Йигъар» къайд апIури шулу. Сентябрин 6-пи йигъан душваъ кIули гъубшу «Лизи кьарнийирин Йигъариз» бахш дапIнайи серенжем му машквар арайиз гъювалин тарихдикан вуйи ихтилатналан ккебгънийи. Серенжемдиъ мялимар, мектебариъ урхурайидар иштирак гъахьнийи. Думу мектебдиъ гьацира Расул Гьямзатовдин шиърар урхбан конкурсра кIули гъубшнийи. Табасаран чIалниинди машгьур шаирин шиърар урхбан номинацияйиъ Мягьячгъала шагьрин 53-пи нумрайин мектебдин 9-пи классдиъ урхурайи Самира Къурбановайи сабпи йишв гъадабгъну. Думу мектебдиъ табасаран чIал киврайи мялим Мадина ТIайибовайи урхурайидарихъди бабан чIал аьгъю апIбиин лайикьлу зегьмет зигура.

Мадина Аслановна ва дугъу тербия туву риш му хъуркьувалихъди тебрик апIури, дугъаз ва дугъу аьгъювалар туврайи ученикариз гележегдиъ хъана заан хъуркьувалар хьувал ккун апIурахьа.