Дербент шагьрин кIулин больницайи медицинайин заан технологияйин кюмек апIуз ихтияр туврайи лицензия гъадабгъну. Гьамус аьзарлуйирихьан ОМС-дин гъурулушдин дахилнаъ адру медицинайин кюмек квотайиинди ва пулсузди гъадабгъуз хьибди.

 

КIваина хурача, гъубшу йисан октябрин вазлихъан мина му больницайиъ, Санкт-Петербургдиан, Москвайиан, Тюмендиан дуфну, ужуб тажруба айи духтрар лихура. Хирургари ликар-хилар гъюргъдариз кюмек туври, гъагъи операцйир апIура. Операцйир гъахруган, дюн’яйин ужударсдар технологйириинди лихурайи фирмйири гьязур гъапIу протезар, рукьан конструкцйир ишлетмиш апIура.

Гъи Дербентдин ЦГБ-йиъ му багьалу кюмек пулсузди тувуз мумкинвал дубхьна.

«Медицинайин заан технологияйин кюмек тувуз лицензия гъадабгъували Дербентдин агьалйириз шагьриан удудучIвди хирургарин медицинайин кюмек гъадабгъуз мумкинвал тувра, гьацира хирургари уьлкейин жара регионарианра аьзарлуйир кьабул апIиди», – къайд гъапIну РД-йин сагъламвал уьбхбан министр Жамалудин Гьяжиибрагьимовди.

Лап багарихьди медицинайин заан технологияйин кюмек машнан кIурбар гъюргъдарихьанра, юкьян гьарин уьзрар кайидарихьанра гъадабгъуз хьибди.

Къайд апIурача, Дагъустандин агьалйириз, духтрихьна гъюбан бадали, направление лазим дар, духтрихьан консультация гъадабгъбан бадали, Дербентдин ЦГБ-йин call-центриз (8-800-100-90-77) зенг дапIну, духтрихьна гъюру йигъ ва сяаьт тяйин апIуб лазим ву.