Гъябгъюрайи йисан 24-пи сентябриъ Дагъустан Республикайин 168 мектебдиъ «Точка роста» кIуру аьлава образование тувру центрар арццнийи. Улупнайи гьарсаб мектебдин кьюб кабинетдиъ рас апIбан ужудар ляхнар кIули гъухнийи.

Республикайин улупнайи 168 мектебдин арайиъ Хив райондиан вуйи 3 мектеб айи: Хиварин, Мажвгларин ва ЦIийи Фрюгъярин. Му мектебариъ рас апIбан ляхнар лазим вуйи къайдайинди кьюб-шубуб гьяфта улихьна ккудукIнайи. Кабинетар арццнушра, мебелилан гъайри, имбу гьякь-гьисабар сабра гьеле хъуркьну адар. Гьаму йигъари дурар хъуркьур дупну, умуд кивурхьа.

КIваин апIуз ккундузузки, му центрар арццувалихъди аьлакьалу вуди, гьам урхурайидарихьанси, дурарин абйир-бабарихьанра, гъирагъдилан иштагь айи касарихьанра – варидарихьан «технология», «информатика», «ОБЖ» предметариан ва гьацира XXI аьсрин ТСО-йин, ИКТ-йин аьгъювалар гъадагъуз хьибди.
Мицдар центрар ачмиш апIували мектебариъ урхурайи баяр-шубари гъадагъурайи аьгъюваларин дережара, ерира за апIиди, хъа урхурайидари улупру натижйирра гъийин деврин тIалабариз жаваб туврудар хьиди.

ТСО-йин, ИКТ-йин му технологйир ишлетмиш апIуз ихь мялимариз, урхурайидариз ва вари иштагь айи касариз ужудар сяътар ва хъуркьувалар ишри!