Каспийск шагьрин аьтрафар яшайишдинна экономикайин артмиш’валин улихьди гъягъру аьтрафарин дахилнаъ а. «Каспийск» ТОСЭР 2017-пи йисан 10 йисаз вуди арайиз гъабхнийи. Гьаци вуйиган, налогарин льготйирра думу аьтрафариин 10 йисан кьувватнаъ гъузру.
ТОСЭР-дин аьтрафариин гьюлин гъирагъдихъ «Каспий Плаза» ООО-йи гостиницйирин комплекс тикмиш апIувал планламиш дапIнайи. Хъа Каспийск шагьрин агьалйири, думу планарихъди рази дарди, тикилишчивалин ляхнар ккергъуз чпихьан удукьру жюрейиинди манигъ’валар апIури гъахьну.
Агьалйирин наразивалариз дилигди, «Каспий Плаза» ООО-йи 11-пи сентябриъ йишвну чпи дибиснайи аьтраф баруйихьди гьебкуз хъюгъну. Каспийск шагьрин Халиловдин ччвурнахъ хъайи кючейиъ айи хуларин агьалйири, йишвну полицияйин гъуллугъчйириз дих дапIну, думу ляхин давам апIуз гъитундар. Хъайигъан уч гъахьи агьалйири бару апIбан бадали урснайи мурхьлар илдирчну.
Каспийскдин агьалйириз гьюлин гъирагъдихъ рягьятвал гъадабгъру парк ачмиш апIуз ккунду. Жюрбежюр фирмйириин шагьрин агьалйирин хугъ’вал илимдар.
Сентябрин 20-пи йигъан «Дагъустан» РИА-йин конференцйир гъахру залиъ «Авалон» компанияйин вакил Мягьямед Расуловдин, «Каспий Плаза» ООО-йин директор Заира Ширинбеговайин ва «Капитал-инвест» тикилишчивалин тешкилатдин вакил Сиражудин Аседовдин иштирак’валиинди пресс-конференция кIули гъубшнийи.
«Дарамат дивуз жара дапIнайи аьтраф лап къайдайсуз гьялнаъ а. Урусатдин Федерацияйин Президент Дагъустандиз гъюрайивалихъди аьлакьалу вуди, шагьрин администрацияйи отель тикмиш апIуз планламиш дапIнайи йишв баруйихьди гьебкувал ккун гъапIнийи. Хъа «Каспийск – ич шагьур» жямяаьтлугъ тешкилатдин вакилари манигъ’валар апIура. Эгер гъюру йисан апрелин вазлиз 100 миллион манатдин ляхнар тамам дарапIиш ва 20 кас ляхниз кьабул дарапIиш, «Каспий Плаза» ООО программайин дахилнаан адабгъура. Му проект уьмриз кечирмиш гъапIнийиш, 800 касдиз лихру йишвар хьидийи, фицики гьюлин гъирагъдиъ уткан парк, отель, дельфинарий тешкил апIувал планламиш дапIна», – гъапнийи Заира Ширинбеговайи.
Пресс-конференцияйиз Каспийск шагьрин администрацияйин вакиларизра теклиф дапIнайи. Хъа мялум дару себебариан шагьрин администрацияйин вакилар журналистарихъди вуйи гюрюшдиз гъафундайи.
