Улихьна йигъари Подольск шагьриъ ММА-йианна грепплингдиан жюрбежюр яшарин категорйириан вуйи спортсменар вари Урусатдин турнириъ иштирак гъахьну. Гьадрарин арайиъ Дагъустандиан вуйи 34 спортсменра айи.

Гьадму спортсменарикан хайлиндар чпин кчIихбариъ гъалиб гъахьивализ, гизафдари пешкешнан йишвар гъадагъувализ лигну, Дагъустандин командайи талитариъ 2-пи йишв гъадабгъну. Турнириъ иштирак гъабхьи Дагъустандин командайин вакиларин арайиъ Мягьячгъала, Дербент, Каспийск, Буйнакск, Къизилюрт шагьрариан ва Табасаран, СтIал-Сулейман, Мягьярамкент районариан вуйи спортсменарра айи.

Табасаран райондиан вуйи спортсменар СиртIич гъулан 2-пи нумрайин ДЮСШ-дин тренер Тимур Къурбанов кIулиъ ади, Дагъустандин командайин дахилнаъди турнириз дуфнайи.

250-тIан артухъ спортсменар уч духьнайи талитариъ Табасарандиан вуйи, 8 йисан яшнаъ айи Басир Кельбисовди ва чпин яш 12 йис вуйи Идаят Идаятовдина Адам Халикьовди 1-пи йишвар гъадагъну.

Гьадму турнириъ Дагъустандин командайин дахилнаъди Буйнакск шагьриъ яшамиш шулайи сарсана ихь ватанагьли – Алан Рашидовра иштирак гъахьну. Чан гъагъишнан категорияйиъ айи спортсменарин арайиъ дугъу- ра сабпи йишв гъадабгъну.

Гъит, ихь гьаму жигьил спортсменариз гележегдиъ хъанара заан хъуркьувалар ишри.