Гъубшу гьяфтайиъ Каспийск шагьриъ РД-йиъ айи Росгвардияйин Управлениейин Каспийскдин ОМОН-дин «Скорпион» десте тешкил дапIну 20 йис хьпаз бахш дапIнайи серенжемар кIули гъушну.
Юбилей къайд апIурайи йигъан Каспийскдиз ОМОН-дин эскрар му йигъахъди тебрик апIуз Кафари Кавказдин округдин милли гвардияйин эскрарин командующийдин сарпи заместитель – штабдин начальник, генерал-лейтенант Сергей Власенко, РД-йин Росгвардияйин Управлениейин начальник, генерал-майор Мягьямед Баачилов, РД-йин Правительствойин Председателин заместитель Рамазан Жяфаров ва жара гъуллугъчйир гъафну.
Серенжемдиз дуфнайи хяларин тебрикнан гафар ккудукIбан кьяляхъ, чпин гъуллугъ ужуди гъабхурайи эскрар «Дявдин иштиракчи», II дережайин «Гъуллугъ хъуркьувалиинди тамам апIбаз лигну», «РД-йин къанун уьбхру органарин лайикьлу гъуллугъчи» кIуру мухрик китIру знакариинди лишанлу гъапIну, ва гьацира дурариз чухсагъул мялум гъапIну ва багьалу пешкешар тувну.
Чан удучIвну улхбаъ Мягьямед Баачиловди къайд гъапIганси, 20 йисандин арайиъ гьюкуматдин наградйириинди му дестейин 48 гъуллугъчи, гьадму гьисабнаан Урусатдин Игит Загьид Загьидовра, ва 193 эскер лишанлу дапIна.
Мидланра гъайри, Росгвар-дия тешкил гъапIхъан мина гъийин йигъаз гьаму дестейин 4 эскриз гьюкуматдин ва 38 касдиз гъуллугънан наградйир тувна.
«Гъи узхьан, чпин жан фида дапIну, ихь арайиан гъушу эскрариканра дарпиди гъитуз шулдарзухьан. Гьаму 20 йисандин арайиъ дестейин 31 кас гъийихну. Гьадрарикан 27 чпин гъуллугънан вазифйир тамам апIурайи вахтна», – къайд гъапIнийи Мягьямед Баачиловди.
Дугъу мялум гъапIганси, ккудушу йисарин арайиъ ОМОН-дин «Скорпион» дестейин гъуллугъчйири административ къанунар чIур апIувалин 40437 дюшюш ашкар дапIна. Уголовный тахсиркарвалариан 225 кас гъидисну; дестейин гъуллугъчйирра иштирак духьну, 453 террористар танкь гъапIну, террористарин 69 блиндажар ккидирчну, 704 аьдад яракь, 61556 дявдин сурсатар, 163 – СВУ ва 302 гранатар тадагъну.
«Узхьан гъи инанмиш’-валиинди пуз шулзухьан, дестейин гъуллугъчйири чпин улихь диву вазифа саб читинвалра адарди тамам апIуру.
Дурарин дирбаш’вали, жан фида апIуз гьязур вуйивали, вафалували му гъуллугънахьна вуйи дерин гьюрматнан гьиссар уягъ апIуру. Дурариз чпин гъагъи зегьметнаъ кIван мюгькамвал, дирбаш’вал, сагъ’вал ибшри», – аьлава гъапIну М.Баачиловди.
Гьюкуматдин наградйир тувнайи ОМОН-дин «Скорпион» дестейин гъуллугъчйирин арайиъ ихь ватанагьли, Табасаран райондин ЖагътIил гъулан агьали, майор Салман Буржумовра айи. Му касдин, ОМОН-диъ лихури, 23 йис ву. Дугъан гафариинди, 1996-пи йисан Новолак райондиъ СОГ (хусуси метлеб айи цIа йивру десте) тешкил гъапIу вахтна, дугъу гьадушваъ ляхин апIуз хъюгъну.
«Узу 1998-пи йисан июндизкьан СОГ-диъ ляхин апIури гъахьунза. Хъасин Урусатдин Игит Загьид Загьидовди уч гъапIу ротайиз гъушнийза. 1999-пи йисан Чечен Республикайин терефнаан ухь’ин варихалкьарин террористар алархьиган, гьадму ротайин дахилнаъди учу, БотIлих, ЦIумада, Карамахи, Чабанмахи террористарихьан азад апIури, Кьадарский зонайиъ дявдиъ иштирак гъахьунза», – ктибтнийи майори. 1999-пи йисандин гьядисйириъ иштирак хьпаз лигну, дугъаз Кьягьялвалин орденра тувна.
Гьамусяаьт ихь ватанагьлийи ОМОН-дин «Скорпион» дестейиъ аьхюну инспекторин вазифйир кIулиз адагъури, чан гъуллугъ давам апIура. Гьелбетда, ляхин гизаф гъагъиб ву. Фицики гьар йигъан гьамциб ляхниз гъягъюрайи кас чан сагъ’вал, жан Ватан бадали фида апIбакан фикир ади хул’ан удучIвурайир ву.
ОМОН-диъ гъуллугъ апIури гъахьи вахтнан арайиъ Буржумовдин уьмриъ гьич зат фикриан дуруршру гьядисйир гизаф гъахьну. Дугъан гафариинди, 2005-пи йисан ЦIумада райондиан мина Грузияйиз террористар гъягъюз гьязур шулайиваликан хабар гъабхьиган, дурариз рякъ гьадабтIуз ОМОН-дин гъуллугъчйир улихьинди гьудучIвну. «Гьадмуган дагълариъ аьхю тик кьал айи йишвхьан тина гъягъюрайи вахтна, ич взводдин командир, учузра рякъюри, гьадушвкан кучIвухну, 300-400 метр ягълишнаан ахънийи ва гъакIнийи. Гьадму дюшюш йиз гьич зат кIваълан дурубшур», – гъапнийи Салман Буржумовди.
Чан хизандиканра улхури, дугъу учв кьюр балин аба вуйиб мялум гъапIнийи. Кьюрид баярира, адашдин ляхин давам апIуз ният дапIна. Аьхюну бали Санкт-Петербург шагьриъ урхура. Хъа кьюрпи бали «Юнармия» тешкилатдиъ десантникарин командирин вазифйир тамам апIура.
Салман Буржумовдин уьмрин юлдаш илмарин кандидат ву ва ДГПУ-йиъ ккергъбан классариз дарсар кивру мялимар гьязур апIру факультетдиъ мялимди лихура.
Гъит, гьамцдар кIубан касар ихь арайиан зат кам даришри.
