Гьар йисан 4-пи ноябриъ ихь гьюкуматдиъ халкьдин сабвалин машквар къайд апIури шулу. Му машквар Урусатдин варитIан жигьил машкврарикан саб ву. Халкьдин сабвалин Йигъ Президент Владимир Путинди РФ-дин Госдумайин къанундин проектдин тереф уьбхбан натижайиъ арайиз гъафну. 2005-йисхъан мина му машквар ихь гьюкуматдиъ дуланмиш шулайи вари милетари къайд апIура. Му машквар къайд апIбан асас метлеб – ихь гьюкуматдиъ дуланмиш шулайи жюрбежюр халкьарин арайиъ сар-сарихьна вуйи гьюрмат, сабвал уьрхювал ву.
4-пи ноябриъ, му йигъаз тялукь вуди, Дербент шагьриъ, лезгйирин драмтеатрин улихь хьайи майдандиин машкврин концерт кIули гъубшну. Машкврин улихь СтIал Сулеймандин ччвурнахъ хъайи паркариъ, шикларин выставкйир бицIидариз вуйи мастер-классар ва жюрбежюр жара серенжемар кIули гъухнийи.
Шагьрин асас серенжемдиз вари Дербентдиан жюрбежюр кIубан, актив вуйи касар, гъуллугъчйир уч гъахьнийи ва, шагьрин ккудубшу тарихдиканра кIваин апIури, сар-сариз машквар мубарак гъапIнийи.
Шадлугънан серенжем, Дербент шагьрин артистари ихь гьюкуматдин гимн дупну, ачмиш гъапIний.
Дербент шагьрин мэр Хизри Абакаровдин ччурнахъан мубаракнан гафар дугъан кюмекчидЗаур Эминовди гъапнийи: «Ухьу вари жюрбежюр миллетарин вакилар вухьа. Гъи ухьу вари сатIи апIурайиб ихь аьхю кьувватнан Ватан Урусат ву. Гъи уччвуди фикир гъапIиган, Дербент, миллетарин арайиъ гьаммишан сабвал, гьюрмат уьбрхюри, варидариз чешне, нумуна улупурайи шагьур ву. Ухьуз аьгъюхъан мина ихь эвелихъан мина мушваъ айи инсанар чиб-чпихъди албагну, сар-сарихьна аьхю гьюрмат ади ва разиди яшамиш шула».
Шагьриъ яшамиш шулайи вари ватанагьлийир Хизри Мягьямедовичди ва йиз терефнаан му машкврихъди тебрик апIураза ва варидариз жандин сагъ’вал, кIван шадвал ккун апIураза. Му серенжемдиз дуфнайидар Дербент шагьрин МВД-йин ветеран, насигьятчи Эмирбег Агъагюловди ва имамарин насигьятчи Абубакар Аьливердиевди мубарак гъапIнийи. Машквар гъабхурайидари дидин тарихдиканра кьюб гаф гъапнийи. 1612 йисан 4-пи ноябриъ ихь меркез Москва шагьур Польшайин кьушмарихьан азад апIбан гьядисйирихъди аьлакьалу вуди къайд апIурайиб ву.
Серенжем Дербент шагьрин администрацияйин культурайин, жигьиларин политикайин, спортдин отдели лихурайи гъуллугъчйири тешкил гъапIуб вуйи. Серенжем тешкил апIбан асас метлеб – Дербентдиъ яшамиш шулайи жюрбежюр миллетарин аьдатарихъди, культурайихъди таниш апIувал вуйи. Душваъ жюрбежюр миллетарин чIалариинди вуйи мяълийирра гъапIнийи. Учв серенжемра лап ужуйи ва халкьдин сабвалин машкварси кIули гъубшнийи.
