Хив райондин Ляхлаарин кьялан мектеб ужудар пишекрар, устад мялимар-шаирар айиб ву. Дурарин лайикьлу ччвурар фукьан ктухурушра, узу бизар дарза: Керим Маллаев, Везирхан Гюлечев, Кюребег Мурсалов, Аьшурбег Аьшуров, Рамазан Аьзизов, Анварпаша ТIаибов ва хайлин жарадар. Дурарин цIарнаъ айи Нариман Аьбдулкеримов гьаму йигъари ихь арайиан гъушну.
Му хажалатнан хабар гъеебхьиган, узу Ляхлаарин гъулан мектебдин гьюрматлу мялим Аьшурбег Аьшуровдихьна илтIикIнийза. Дугъахъди Нариман Сяидовичдин уьмрикан ва пишекарвалин ляхникан мяналу сюгьбат гъубхнийза.
«Нариман Сяидович, бабкан шлур мялим ву пну, халкь гъапIур вуйи. Думу 1939-пи йисан Хив райондин Ляхлаарин гъулаъ касиб кюлфетдиъ бабкан гъахьну. 1946-пи йисан Нариман багъри гъулан мектебдиз гъягъюру, ва 1953-пи йисан 7-пи класс ккудубкIну, дугъу Табасаран райондин Гуми гъулан мектебдиъ урхувал давам апIуру. Советарин Армияйиъ шубуд йисан эскервалин буржи тамам дапIну, 1963-пи йисан Нариман ДГУ-йин тарихи (инглис) чIаларин мялимвалин курсарик очно вуди урхуз кучIвру. 1966-пи йисан 3-пи курснаъ айиган, дада гъагъи гьялнаъ айивализ лигну, йитим бай, урхуб дипну, гъулаз гъюру. Гьадму йисан мектебдиъ дугъу делопроизводителин ляхин апIуз ккебгъру. 1967-пи йисан думу заочно вуди Ставрополь шагьрин пед-институтдин филологияйин факультетдик урхуз кучIвру. Урхуб ккудубкIбалан кьяляхъ, сад йисан мектебдиъ урус чIалнан ва литературайин дарсар кивру. Хъасин, мектебдин администрацияйин, мялимарин тIалабниинди, Таганрог шагьрин тарихи (инглис) чIаларин пединститут ккудубкIуру. Гьаддихъан мина чан уьмрин аьхиримжи йигъаризкьан думу инглис чIалнан аьхю гьярфналан мялим вуди гъилихну. Гъуландарин, мектебдин мялимарин ва баяр-шубарин, аьхюр-бицIирин арайиъ дугъу лайикьлу йишв ва гьякь-гьюрмат гъазанмиш гъапIну. Дугъан пишекарвалин ляхин райондин ва гъулан администрацйирин, респуб-ликайин терефнаан грамот-йириинди, гьюрматнан кагъзариинди, «РФ-дин лайикьлу мялим» ччвурнахъди лишанлу дапIна.
Нариман Сяидович ужуб ва баркаллу хизандин эйсира вуйи. Дугъу чан уьмрин юлдаш Гюлферездихъди шубур байна кьюр риш арайиз адагъну, тербия тувну, эвленмиш дапIну, дурарикан хал-хизандин эйсйир гъапIну. Гъит, дурарин кIваз сабур туври.
Нариман Сяидович аьхиримжи рякъюъ тIауз республикайиан, райондиан, гъулариан, ужур ву пну, шагьидвал апIуз ва чан гьаммишандиз вуйи архаин хулаъ сикин апIуз, думу адмивалин шартIар кайи касарикан сар вуйивал гьисаб апIури, варжариинди инсанар гъафнийи, жан бай», – ктибтнийи Аьшурбег Аьшуровди.
Ав, гьюрматлу мялимдин ктибтбаан пуз шулуки, Нариман Сяидович, дугъриданра, халис мялим ву пну, халкь гъапIур вуйи, фицики, чан 80 йискан дугъу 50 йистIан артухъ мялимвализ бахш гъапIну. А.Некрасовдин му гафар, гьамцдар лайикьлу мялимар фикриъ уьрхюри, дидикIнайидар ву:
Мялим!
Яв лайикьлу ччвурнан улихь,
ихтияр тув,
кьамкьариинди дийигъуз…
Мицир кас арайиан гъя-гъювал, гьелбетда, учIврушин ву. Багахьлуйириз, думу таниш вуйи касариз ва гьацира мектебдин коллективдиз башсагълугъ’вал ккун апIурахьа. Гъит, дурариз кIван сабур ва багъри касдин сурат гьарган фикриъ уьбхюз сагъ`вал туври.
