Ич хизан Санкт-Петербург шагьриз Дагъустандин Хив райондин Хирижв гъул’ан кючмиш гъабхьиб ву. Узу гьамушваъ Миринский кьялан округдин мектебдиъ 6-пи классдиъ ужудар кьиматариз урхураза. Узуз дада, адаш ва бицIи гъардаш азуз. Гъардаш бицIидарин багъдиз гъягъюра.

 

Улихьна йисари учу гьар йисан хьадан тятIиларин вазари багъри ватандиз гъягъюйча. Улубкьурайи цIийи йисанра гъягъюр кIури, миж кайиз. Учу хулаъ табасаран чIалниинди улхури шулча. Узуз йиз чIал гизаф ккундузуз. Бязиган узу мектебдиъ йиз бабан чIалниинди улхруган, узухъди саб классдиъ урхурайи шубари, фунуб чIалниинди улхурава кIури, гьерхру. Думуган узу мушваъ саризра аьгъдру, анжагъ узуз багъри вуйи чIал аьгъювалиинди дамагъ апIури шулза.

Аьхиримжи вахтна узу гьар гьяфтайин султ йигъан ич шагьриъ Беринга 23 кючейиъ ерлешмиш дубхьнайи Дагъустандин культурайинна аьгъювалар тувру Центриз табасаран чIал дубгъуз гъягъюраза. Душваъ узу жара табасаран бицIидарихъди таниш гъахьунза.

Учу цIийи гафар, гьярфар, гьисабар дургъурача, Табасарандин ва Дагъустандин тарихдикан, культурайикан, аьдатарикан аьгъювалар гъадагъурача.

Узуз йиз чIал, ватан, багъри Хирижв гъул, Зайнабат бабна Аьлибег аба, Шумшат бабна Бейбала аба гизаф ккундузуз. Дагъустандиъ учу адашди гьюлихъна сирнав йивуз, дагълариз сейир апIуз хъади гъягъюру. Хъа узуз гъуларин сумчрар варитIан кьабулди вузуз. Йиз абйирин багъри гъулаъ узуз таниш вуйи вари дустшубариз Санкт-Петурбург шагьриан мани саламар хътаураза.