Улихьнаси Табасаран райондин «Табасаран» кIуру мини-футболин командайи Кьибла Дагъустандиъ мини-футболиан кIули гъубшу турнириъ сабпи йишв гъадабгъну. Му хъуркьуваликан ктибтуз учу командайин капитан, Хючна гъулан советдин депутатарин Cобраниейин депутат Агъариза Аьлирзаевдиз теклиф гъапIнийча. Думу РД-йин Халкьдин Собраниейин багахь хьайи жигьиларин Парламентдин депутат Марат Рягьимовдихъди сатIиди газатдин редакцияйиз хялижвди гъафнийи.
«Табасаран» мини-футболин команда тешкил дапIну 8 йис тамам шула. Командайи мини-футболиан республикайиъ кIули гъягъру саки вари турнирариъ иштирак’вал апIура.
«Кьибла Дагъустандин чемпионат Мягьярамкент райондиъ кIули гъубшнийи. Душваъ ихь команда гьюрматниинди кьабул гъапIну. Талитарра заан дережайиъди кIули гъурхнийи. Командайин хайлин баярихьан турнириз гъюз гъабхьундайи. Нубатнан талитариъ иштирак хьуз варидариз вахтра, мумкинвалра бихъиди кIури, фикир апIураза», – къайд гъапIнийи ич сюгьбатнан кIулиъ Агъариза Аьлирзаевди.
«Улихьган ич команда футболиан тренировкйир гъахуз Дербент шагьриз гъябгъюз мажбур шуйи, фицики райондиъ футбол уйнамиш апIуз ужуб майдан адайи. Учу, пул туври, вахтназ вуди футболин бицIи майдан бисурача. Аьхиримжи вахтна Табасаран райондиъ спорт артмиш апIувализ хайлин фикир тувра. Гьаци, мини-футболин 8 цIийи майдан арццуз йишвар гьязур апIура. Багарихьди аьгьвалат дигиш хьибди, ва гьаддихъди аьлакьалу вуди ич хъуркьуваларра за хьибди кIури, миж кайиз. Хъуркьувалар ужудар шартIар дюзмиш дапIнайиган, мумкинвалар айиган ва гьацира футбол уйнамиш апIбиин аьшкь айивалиан арайиз гъюру.
Аьшкь ихь футболистариз а, лазим вуйи шартIарра яратмиш апIурахьуз. Узуз ич вари командайин терефнаан учуз спонсорвалин ва жара кюмекар туврайи Марат Гьяжиибрагьимовдиз, Муса Гьябибовдиз, Жейран Мягьямедовнайиз, Марат Рягьимовдиз ва жара баяриз чухсагъул мялум апIуз ккундузуз», – гъапнийи командайин капитанди.
Агъариза Аьлирзаевичди мялум гъапIганси, багахь гележегдиъ командайи Хючна гъулан поселениейин глава Аьбдуселим Гираевдихъди сатIиди, жигьилар, аргъаж шулайи насил футбол уйнамиш апIбахьна жалб апIури, мини футболиан райондин чемпионат тешкил апIиди.
«Команда уьбхбан бадали, футболистар лазим ву. Ихь жигьилар футболин цIийи майднариина тренировкйириз гъиди ва чпин мумкинвалар улупиди. Спортдин мектебариъ лихурайи тренераринра, жигьиларихьна туп тувну, чиб гьудучIвну гъягъювал дюз дар. БицIидариз футбол уйнамиш апIуз улупну ккунду», – кIура Агъариза Аьлирзаевди.
Марат Рягьимовди гюрюшдиъ, чав федералин грантдиъ гъалиб духьну, Хючна гъулан стадиондиин гъийин деврин тIалабариз жаваб тувру, вари лазим вуйибдихъди тямин дапIнайи мини-футболин майдан тикмиш дапIну ккудубкIурайиваликан гъапнийи. Ноябрин аьхириъ му майдан абццуз планламиш дапIна.
Редакцияйин мялуматарин дакьатариан тина Марат Рягьимовди футболин цIийи майдан ачмиш апIбан шадлугънан серенжемариз табасаран ватандашариз теклиф гъапIну. Думу майдан ачмиш апIру йигъан гьадушв’ин мини-футболиан республикайин турнирра гъабхиди.
