Дагъустан Республикайиъ, хъа асас вуди Мягьячгъалайиъ, жямяаьтлугъ транспортдин кьимат за апIувалихъди аьлакьалу вуди аьхиримжи вахтари гизаф улхбар гъягъюра. Ав, икибаштIан, гъийин девриъ йигълан-йигъаз итIру сурсатарин, алабхьру палатдин кьиматар за шули, хъа гъадабгъурайи маважибдин кьадар артухъ даршулайиган, анжагъ саб маважибдиинди яшамиш шулайи, гьар йигъан жямяаьтлугъ транспортдиъди ляхниз гъягъюрайи касариз рякъюн кьимат сабпну 17 манатдилан 23 манатдиина за гъабхьиган, лап гъагъиди алабхъуру.
Маршруткайихъди рякъюъди гъягъбан кьимат 17 манатдилан 23 манатдиина за апIувалиин, аьдати агьалйирси, чиб жямяаьтлугъ транспортдин эйсйирра, шагьрин кючйириъ маршруткйир хъаърайидарра рази дар. Фицики, маршруткайиъди саб бицIи арайиъ эъну гъягъбаз 23 манат – лап гизаф ву.
Республикайин меркездин айитI лихурайи маршруткйир ктарди, гьятта Мягьячгъала-Каспийск шагьрарин арайиъ лихурайи автобусарин кьиматра 5 манатдиинди (15 манат), хъа троллейбусарин кьимат – 3 манатдиинди (13 манат) за гъапIну. Амма, автобусаринна троллейбусарин кьимат за гъапIну кIури, дурариз чIалкьан кIурайир адар. Хъа маршруткйириъди гъягъбан кьимат за апIувалин гьякьнаан гьаму йигъари швнуб-саб митингра кIули духна.
Мягьячгъалайин кючйириъ лихурайи 69-пи ва 44-пи линияйин маршруткйирин водителарихъди гюрюшмиш духьну, дурарихъди гафар-чIалариан мялум гъабхьиганси, кьимат за апIурайидар водителар дар, хъа маршруткйириъди инсанар гъахрударин компанйирин кIулиъ айидар ву. Дурарин гафариинди, йигъандин арайиъ ляхин апIбиинди гъазанмиш гъапIу вари пул чпин водителарин хилиъ гъубзра. Яна му гъазанждик инсанар мина-тина гъахру транспортдин компанияйин пай ктар. Гьаддиз, рякъюн кьимат за апIуваликан «Шубубпи парк» кIуру транспортдин компанияйиз файда а. Фицики, му компанияйин машинарихъ водителар маважиб туври лихура. Гьаддиз рякъюъди гъягъбан кьиматар за апIбиинди чпин хусуси машинарихъди лихурайидарин машинариъ инсанар эдреъруси дапIну, яна дицдар машинар линияйиан адаъну, маважиб туври «Шубубпи паркдин» машинар лихругансиб метлеб ади кьиматар за апIурайидар ву.
Рякъюн кьиматар за апIбан гьякьнаан жюрбежюр социалин сетариъра инсанари чпин фикрар ачухъ апIура:
@obuv_bu.radim: «Гъи учуз водители гъапунчуз: «Учву, 23 манат дибикIну кебхна кIури, дидиз милиганай, чавай 17 манат. Думу кIажар учу керхдар дар»;
@marymka777_00: «Ихь уж’вална ккебехънайивал кьувватсузвалси гьисаб апIура. Гъачай, вариди сатIиди ихь кьувват, хасият улупурхьа. Учвуз гьадму кепкарикан мюгьтаж’вал адаршра, учухъди сабхилди удучIвай. КIури шулу: «Саб кепки манат уьбхюру», гъачай, ихь кепек уьбхюрхьа».
@nabievakha: «Халкь! Ухьуз кучIлар апIура. Гьич фукIа дигиш дубхьнадар. Наанди гъилигиш, бикарвал рябкъюра, лихру йишвар адар, вари шей’ар багьа шула, касибар имбубтIан касиб, девлетлуйир – хъанара артухъси девлетлу шула. Рякъин кьимат цIиб ужузди вуйи автобусариъра гьаммишан уьчIюкьну, лик дивуз йишв адарди шулу».
Гьаму жюрейин фикрар хайлиндари ачухъ дапIна. Рябкъюрайи аьгьвалатнаан вари халкьра, маршруткйирин водителарра кьиматар за апIбаз аькси ву. Гьаци вушра, кьимат за гъапIну. Рякъюъди гъягъбан кьимат гьаз за гъапIну кIуру суалназ инсанар мина-тина гъахру транспортдин компанйири туврайи жаваб гьамциб ву: «Машинарихъ хъубзрайи убгруб багьа гъабхьну». Амма газран кьимат хайлин ис дубхьна. Хъа рякъюн кьиматар гьаз за гъахьнуш, му суалназ жаваб гьелелиг адар.
Рякъярин кьимат за апIбан гьякьнаан Урусатдин УФАС-дин Дагъустандин отделениейи дело гъитIибккну. Дело гъитIибккайиз улихьна УФАС-ди пассажирарихъди ляхин апIурайи Мягьячгъалайин 8 компанияйиз, кьимат гьаз за апIураш гьерхри, кагъзар хътаънийи. Хъа вари 8 компанияйикан анжагъ саб «Автоград» кIуру компанияйитIан, кьимат за гъапIундарча ва апIузра ккадарча кIури, жаваб тувундар. Гьамусяаьтра тялукь органари му месэла гьял апIури ими.
