Гъубшу элгьет йигъан ихь уьлкейиъ РФ-дин айтIан ляхнарин гъуллугъчийин Йигъ къайд гъапIну. Думу йигъахъди аьлакьалу вуди Табасаран райондиъ айи ич хусуси мухбир Ражаб Нуров Урусатдин МВД-йин Табасаран райондиъ айи отделин начальник, полицияйин подполковник Тельман Гьяжиевдихъди гюрюшмиш гъахьну. Дурарин арайиъ гъабхьи сюгьбат жикъиди исихъ чап апIурача.
– Тельман Гьяжиевич, Дагъустан Республикайин милицияйин тарихдикан, гьацира сабпи ражари душваъ лихуз хъюгъю гъуллугъчйирикан ктибтувал ккун апIураза.
– 1920-пи йисан 13-пи ноябриъ Дагъустандиз автономия тувувал тарихи гьядиса гъабхьну. Думу йисан вари йишвариъ айи ревкомариз милицияйиз аьхю фикир тувуз, милицияйин начальникарди дерккуз лап гьякьлу коммунистар улупуз теклиф гъапIнийи. 1920-пи йисан апрелин вазлиъ Кафари Кавказдин оборонайин Советдин руководителари Дагъустандин фягьлийиринна нежбрарин милицияйин сарпи начальникди Табасаран райондин Ярса гъул’ан вуйи, 21 йисаъ айи Керим Мамедбегов дерккну.
Думу Дагъустандиъ Со-ветарин гьюкум тешкил апIбахъан 10 йистIан артухъ вахтна милицияйин ЧК-йин ва ОГПУ-йин органарин кIулиъ ади гъахьну. Чан уьмрин аьхиримжи йисари думу Дагъустандин Халкьдин Комиссарарин Советдин председателди гъилихну.
1929-пи йисан Табасаран райондиъ милицияйин отдел абццну. Райондин ОМВД-йин кIулиъ хайлин бажаранлу офицерар, табасаран халкьдин кIубан баяр гъахьну: Керим Рамазанов, Гьямдуллагь Къамбаров, Гьяжи Къягь-риманов, Мягьямед ТIа-гьиров, Султан Султанов, Тельман Мягьямедов, Сейфудин Аьгьметханов, Абзуддин Шябанов, Артур Аьлиев, Исмет Агъасиев.
– Террористарихъди женг гъабхбаъ фицдар читинвалар алахьурачвуз?
– Гьамусяаьт Табасаран ра-йондин ОМВД-йиъ 10 гъуллугъ а, аттестация дубхнайи 102 гъуллугъчи лихура. Дурари, лап читин, хатIалу дюшюшариъ, чпин улихь дивнайи месэлйир гьял апIури, жямяаьтлугъ къайда уьбхбаъ, террористарихъдина экстремистарихъди женг гъабхбаъ чпин кIубанвал улупура. Дагъустандизна Табасаран райондиз лап читин йигъари дурари чпин игитвал, Урусатдин жилариин сабвал уьбхюз чиб гьаммишан гъязурди вуйивал тасдикь гъапIну. Райондин жилариин террористар тIанкь апIбан бадали, швнуб-сабан террориствализ аькси операцйир кIули гъухну ва думу ляхин гьамусра яваш дапIнадар. Террористарихъди ва экстремистарихъди аькси женг гъабхурайи игит офицерарикан сар райондин ОМВД-йин участокдин вари ихтиярар айи аьхюнур вакил, полицияйин майор Гьясан МутIалибов вуйи.
Думу 2016-пи йисан 30-пи мартдиъ СиртIич гъулан гъвалахъ, СтIал Сулейман райондиз гъягъру рякъ жара шлу йишвахь йивну гъакIну. Гьясан МутIалибов чан юлдшарихъди шаклу машин дебккуз чалишмиш гъахьнийи (дидиъ къанун уьбхру органари агурайи, террористарин рякъюъ айи Э.Н.Гьяжиев Гьясан МутIалибовдиз аьгъю гъахьну), амма машин дедребккди гъубшнийи. Террористарин машин 2 километр гъябгъбалан кьяляхъ, Гьясан МутIалибовди дидин улихьишв гьадабтIну.Тахсиркрари тIубкIру сяняаьт гьяракатназ гъабхиган, офицер али йишв’ин йикIуру, хъа дугъан юлдаш Тарлан Аьгьмедовдиз лап хатIалу зийнар шулу. Гьамци, Гьясан МутIалибовди ухьу 1-пи ва 9-пи майдин машкврариз террористари гьязур дапIнади хьуз мумкин вуйи тIуркIбариккан азад гъапIну.
2016-пи йисан 28-пи июлиъ Табасаран райондиз полицияйин майор Гьясан МутIалибов йивну йикIбалан кьяляхъ «Кьягьялвалин орден» тувбиинди лишанлу апIуз Дагъустан Республикайин МВД-йин министр Аьбдурашид Мягьямедов ва Халкьдин Собраниейин депутат Мягьямед Къурбанов гъафнийи. Гьясан МутIалибовди ватан ва жара инсанар бадали жвуван жан дивну. Дугъан игитвал полицияйин жигьил гъуллугъчйириз аьхю нумуна ву. Дугъан юлдаш, Урусатдин МВД-йин Табасаран райондиъ айи отделин полицияйин патрулинна-постнан гъуллугънан аьхюнур сержант Тарлан Аьгьмедовдизра «Жямяаьтлугъ къайда уьбхбаъ тафавутлу хьпаз лигну» медаль тувну.
– Гъуллугънан вазифйир тамам апIури, райондин ОМВД-йин швнур гъуллугъчи гъийихну?
– 1929-пи йисхъан мина гъийин йигъазкьан чпин гъуллугънан вазифйир тамам апIури гъийиху гъуллугъчйирин кьадар 7 кас ву. Магьа дурар: Табасаран РОВД-йин милиционер, милицияйин старшина Аьбдуллаев Рамазан Аьгьмедович (21.08.1966); Табасаран РОВД-йин силисчивалин дестейин аьхюнур силисчи, юстицияйин майор Асланов Назим Фатдахович (19.05.1998); Табасаран РОВД-йин хатIалу тахсиркрар агру оперуполномоченный, милицияйин майор Керимов Султан Камилович (08.09.2008); Урусатдин МВД-йин Табасаран райондиъ айи отделин старшина, милицияйин прапорщик Къазимягьямедов Мурад Мягьмудович (26.06.2012); ТП УФМС-дин Урусатдин МВД-йин Табасаран райондиъ айи отделин инспектор, айтIан гъуллугънан аьхюнур лейтенант Аьбдулов Габиль Исмяилович (23.09.2013); Урусатдин МВД-йин Табасаран райондиъ айи отделин ППСП-йин полицейский, полицияйин прапорщик Ажигельдиев Эльдар Аьгьмадович (23.09.2013); Урусатдин МВД-йин Табасаран райондиъ айи отделин участокдин вари ихтиярар айи аьхюну вакил, полицияйин майор МутIалибов Гьясан Мевлудинович (30.03.2016).
Саб хайлин ич гъуллугъчйир хатIалу зийнариан инвалидар гъахьну. Террористарин хилариан йивну гъийиху гъуллугъчйирин гьюрматназ жигьиларин арайиъ мини-футболиан турнир тешкил апIури швнуд-сад йис ву. Гьаци, 7-пи октябриъ Хючна гъулаъ стадиондиин, полицияйин аьхюну лейтенант Габиль Аьбдуловдин яс уьбхбаз тялукь вуди, мини-футболиан нубатнан турнир гъубхну.
Гьацира отделиъ ветеранарин тешкилатра либхура, дурарин кьадар 70 кас ву. Ветеранар, чиб ляхниъ имдаршра, жигьилариз кюмек апIури, полицияйин жергйириъ гъузра. Ветеранарин советдин председателди отставкайиъ айи майор Мутелим Сеидов лихура.
Къайд дапIну ккундуки, Тельман Гьяжиев Табасаран райондиъ айи ОМВД-йин начальникди 2014-пи йисхъан мина лихура.
Урусатдин МВД-йин Табасаран райондиъ айи отделин вари гъуллугъчйириз райондиъ ислягьвал, хатIасузвал уьбхбан ляхниъ чпин улихь дивнайи гъагъи месэлйир гьял апIуз кьувват, бажаранвал, дирбаш’вал ва сагъ’вал ккун апIурхьа.
