Гъубшу гьяфтайиъ Табасаран райондин администрацияйин заседанйир гъахру залиъ райондин мектебарин заан классариъ урхурайидарихъди «Уьмриз путёвка — 2019» кIуру гележегдиз пише ктабгъбан форум кIули гъубшнийи. Му серенжем Табасаран райондин жигьиларин центри, дидин директор Рамис Рамазанов кIули ади, тешкил дапIнайиб вуйи.
Форум жикъи улхбиинди райондин депутатарин Собраниейин председатель Аьлимягьямед Къазиевди ачмиш гъапIнийи. Дугъу форумдин иштиракчйир Табасаран райондин глава Мягьямед Къурбановдин терефнаан тебрик гъапIнийи ва заан классариъ урхурайи баяр-шубариз чпин пише фикир дапIну ктабгъуз насигьят тувнийи, гьаз гъапиш пише ктабгъувал варитIан читин месэла ву.
Йигъинжагъ давам апIури, Табасаран райондин главайин заместитель Заур Мусаевди форум тешкил гъапIу ММЦ-йиз чухсагъул мялум гъапIну ва гьамцдар серенжемар кIули гъахбаз кюмек апIуз райадминистрация гьарган гьязур вуйиваликан гъапну. Серенжемдиъ удучIвну гъулху «Табасаран район» МР-ин культурайин, спортдин, туризмдин ва жигьиларин политикайин отделин начальник Аьбдулвагьаб Аьбдуловди, райондин образованиейин управлениейин начальник Аьбдусалам Гьясановди, МЦБС-дин директор Рафик Аьлиевди, «Хючна гъулан Совет» СП-йин глава Аьбдуселим Гираевди форумдин иштиракчйириз чпин уьмрин пише ктабгъбаъ варитIан кIваан вуйи мурад-метлебарихъ хъуркьувал ккун гъапIнийи.
Хъасин серенжемдиъ Дагъустан Республикайин вузарин ва ссузарин вакилари чпин урхбан идарйирикан видеойин презентацйир, мастер-классар улупнийи ва чпин хусуси умьриан вуйи мисаларикан мялум гъапIнийи.
Форумдин ляхин давам апIури, дидин иштиракчйирихъди, жвуваз фунуб пише багахь вуш, уьмрин фицдар жигьатарихьна хусуси метлеб ва яратмиш апIбарихьна жвуван гьевес аш аьгъю апIбан бадали, тестирование гъубхнийи.
Серенжемдин аьхириъ «Уьмриз путёвка — 2019» форумдин иштиракчйириз сертификатар пай гъапIнийи.
