Дагъустандин хирургари чпин пишекарвалин ляхниъ тек-бирра алалабхъру дюшюш ужуб натижайиинди тамам гъапIну.

Улихьнаси, гакIвлар гьадатIурайи вахтна болгарка хил’ан адабхъну, кьамкьлин исккан саки вари лик хъадабтIнайи жилир РД-йин клинический больницайиз гъахну кIури, СМИ-йин вакилариз РД-йин сагъламвал уьбхбан Министерствойин пресс-гъуллугънаан хабар тувнийи. Му аьгьвалатнаъ Републикайин ортопедия-йинна травматологияйин центрин духтрар дишлади зарар гъабхьи касдин операция апIуз хъюгъну.

Читин операцияйиъ рес-публикайин клиникайин больницайин кIванна табарин варитIан ужур хирург Ислам Альбориевра иштирак гъахьну.

Хьуб сяаьтнан арайиъ лап дикъатлувалиинди гъубху операцияйин натижайиъ духтрарихьан пациентдин лик уьбхюз удукьну. Духтрари аьзарлуйиз, лик, сагъ гъабхьиган, думу гьич саб читинвалра адарди ккубсуз шлуваликан хабар тувну.