СацIиб вахт улихьна Табасаран райондиъ цIийиди тикмиш дапIнайи аьхю мист ачмиш гъапIнийи. Гъи газатдин машариъ думу шадлугънан сережемдиъ иштирак гъахьи газатдин гьюрматлу дуст МутIалиб Гьясратовдин му гьядисайиз бахш дапIнайи макьала туврача.
Гъи Табасарандиъ мистар адру гъулар имдар. Ихь ата-бабйирилан мина ккебгъну, гьарсаб гъулаъ чан заманайиз гъилигу ва гьацира гъулан жямяаьтдин кьувватназ хас вуйи успагьи мистар ади гъахьну. Гъи ихь абйирин аманат гьаму вахтнан ва ихь гележегдин насларихьна дурубкьна. Гьарсаб шейъ-шюйъназ Аллагьу Тяаьлайи дивнайи вахт а; вахтар-заманйир гъягъюру, дурар йирси-кьаби шулу ва аьхириъ дюн’яйилан дургуру. Гьаму заманайиъ инсанарин яшайиш лап заан ва ужуб гьялнаъ а, дурариз аьхю хъуркьувалар ва кьувватар тувна. Чпин уьмрин аьхириз дуфнайи кьаби мистар жюрбежюр гъуларин жямяаьтари, дарагъну, дурарин йишв’ин таза ва лап успагьи дараматар-мистар дивра, швнуб-саб аьсриз чпин ляхин давам апIури гъузруганси.
Гьацдарикан саб ву, пуз шулу, Улуз гъулаъ сад йисандин арайиъ диву мист-уьмарат. Думу вари элин кьувватниинди дивну. Пулин дакьатариинди тикилишдиз аьхю кюмек гъапIдарси Каспийск шагьриъ яшамиш шулайи дилаварчи кас Имран Наврузович, Дагъ. Огни шагьриан вуйи Руслан Сулейманов, Дербент шагьриан вуйи дилаврчйир Хизри Асланов ва Мукаил улупуз шулу. Гъулаъ айи гьарсаб кюлфетдира, чпихьан шлуси, пулин дакьатарихьдира аьхю кюмек гъапIну. Дидланра савайи, улзарин жигьилари гъулан имам Расул Аслановдин регьберваликкди тикилишдин ляхнариъ иштирак’вал гъапIну.
Мист ачмиш апIбан мажлис 3-пи ноябриъ, хъа гьижрайиинди 1441-пи йисан 6-пи Рабиуль-Авваль вазлиъ кIули гъубшнийи. Машквриз Табасарандин КIирах ва Харали мягьялариан хялар ва гьацира Дербент шагьрин «Бабуль-Абваб» мистан вакилар дуфнайи. Машквар Мягьямед Пайгъамбар (с.аь.в.) бабкан гъахьи вазлиин алабхъну, гьаддиз Улуз гъулан агьалйириз, пуз шулуки, кьюб шадлугънан машкврар сатIиди гъахьну. Мевлюд гъулан имам Расул Аслановди ачмиш гъапIнийи, хъа думу ТинитI гъулан имам Рягьимди гъубхнийи.
Сифте гаф Табасаран райондин кIулиъ айи Мягьямед Къурбановдиз тувнийи. Дугъу улзарин жямяаьт му кьюб гъатди дуфнайи машкврихъди кIваантIан тебрик гъапIнийи ва дурариз жандин сагъ’вал ва заан хъуркьувалар, хъа дуфнайи хялариз гьарсаб гъулаъ гьаму жюрейин шадвалар артухъ хьуб ккун гъапIнийи. Аьхириъ дугъу чан улхбаъ гьарсаб гъулан жямяаьтдин арайиъ гьюрмат, улихьдин вахтариси аьхюдарин ва бицIидарин арайиъ сигъ ва чвевалин аьлакьйир гъузувал, улихь вахтариси гъуландарин арайиъ гьюрмат-гьязат даима гъубзруси чалишмиш хьувал ккун гъапIнийи.
Му йигъан уч духьнайидариз насигьятнан гафар райондин имамарин председатель Рамазан Пирмягьямедовди, Хянягъ гъулан имам Надир Зулфикьаровди, ХустIил гъулан имам Мягьмуд Аьлиевди, ТIивкарин гъулан имам Рамазну, «Бабуль-Абваб» тешкилатдин дахилнаъди ляхин апIурайи Исламдин университетдин ректор Ариф Сяидовди гъапнийи. Дурари Мягьямед Пайгъамбрикан (с.аь.в.), дугъан Суннайикан, шариаьтдин ме-сэлйирикан ва жара ляхнарикан ктибтнийи.
Мевлюдин натижйир йивуз мумкивал Къужник гъулан советдин глава Шябан Ибрагьимовдиз ва Улуз гъулан агъсакъал Мурадяли Халиловдиз тувнийи. Дурари гъафи хялариз кIваантIан чухсагъул мялум гъапIнийи ва дурариз жандин сагъ’вал, имандин ижмивал, артухъси гьаму жюрейин мажлисариъ иштирак ва ужудар аьмалариин машгъул хьувал ккун гъапIну.
Гъит, гьарсар фагьумлу кас даима Аллагьу Тяаьлайин гъуллугънаъ ва кIваъ айидарикан ишри, амин!
