Ноябрин ваз чвлин аьхиримжи ваз ву. Гьаддиз малдарари имтигьян тувру вахт дуфна. Фуж кьюрдухьна фици гьязур гъахьнуш, гьаддикан мал-къара кьюрд’ан адапIуз лазим вуйи ипIруб масу гъадабгъувал асиллу хьибди.
Дербент шагьрин УАПК-йин начальник Мягьямедрашид Къурбановди узуз гьамциб мялумат тувну: «Гъи Дербент райондиъ фермервалин 176 мяишатар а. Дурарин аьхюну пай хусуси фермйир ву, хъа дурар тешкил апIбан бадали, дурариз хутIлар ва аьхю пай жилар 40 йисазди арендайиз тувна.
Гъи Дагъустандин улихь-кIулихь хьайидари ихь республикайиъ ляхин апIурайи малдарвалин тешкилатариз, гьам мал-къарайиз ва гьамсана дурарихъ зегьмет зигурайи малдарариз, вари терефариан ужудар шартIар яратмиш апIбаз дикъатлу фикир тувра. Ццийин кьюрдухьна гьязур хьувалра учухь тешкиллувалиинди кIули гъубшну. План 700 тонна вуди, 1000 тонна алфра гьязур дапIна. Фермйирин малдарариз зегьмет зигуз ва рягьятвал гъадабгъуз ужудар шартIар яратмиш дапIна. Ляхнихьан азад вахтари культурайинна гизаф касарин иштирак’вал айи серенжемер гъахуз йишв а. Пленумди улупурайиганси, жямяаьтлугъдин мал-къара кьюрд’ан тешкиллувалиинди, сагъ-саламатди ва чагъди адапIбан, маларин мянфяаьтлувал за апIбан бадали, вари резервйир бегьемди ишлетмиш, гьюкуматдиз малдарвалин итIру сурсатар масу тувбан вари жюрйин планар тамам апIувал лазим шулу. Никк ккудубзувал цIиб, чагъ апIурайи маларин гъагъ ис, баб мал-чарвайин кьадар кам хьпан дюшюшариин душваъ гьич саб вахтнара рази духьну ккундар. Харж апIру гьарсаб килограмм алафди артухъ сурсатар, аьлава гъазанжар хувал гъазанмиш дапIну ккунду.
Кьюрдун йигъари малдарари чпин гизафсиб пай вахт фермйириин адапIура. Гьаддиз лигну, душвариин дурариз зегьмет зигуз ва рягьятвал гъадабгъуз мумкинвал туврусдар шартIар яртмиш апIувал чарасуз лазим ву. Саб гафниинди, малдарариз культура ва яшайиш жигьатнаан яратмиш дапIнайи ужудар шартIари дурарин ляхнихьна вуйи гьевеслувал за, кьюрдун читин шартIариъра хъуркьувалар гъазанмиш апIуз кюмек тувру. Бязи мяишатариъ маларин жинс ужу апIбан ляхнар зяиф гьялнаъ айивал, лиж таза алапIувал лап явашди кIули гъябгъюрайивал, масу гъадагъу жигьил малар вари сагъ-саламатди уьрхбан гьякьнаан бегьемди гъайгъу дизриграйивал гьич саризра жиниб дар. Хьадукраз ккилигури дидригъди, гьамус имиди алафдин бина мюгькам апIбан рякъяр тартиб апIура, алафар уьрхбан цIийи къайдйир агура. Силосна сенаж сенгриъ уьрхювал батIул апIуз вахт хъубкьнайвалин гьякьнаан тажрубайи субут апIура. Фукьан ужуди итIибкъну, зиин йишв мюгькамди илибкну ашра, душвариъ уьрхру алафар пуч шулу. Гьаци вуйиган, дурари маларин алафар уьрхру ужудар илиркнайи йишвар тикмиш апIура. Улихь манишнар хьимиди малар-марччарин кьюрд адапIуз ккайи йишвар рас ва малдарариз лазим вуйи шартIар яратмиш гъапIну. Малар тIунахъ уьрхуз хъюгъю садпи йигъарилан мина вари кьувватар, дурариз эйсивалин ужуб гъуллугъ апIури, кьюрдун вахтнара дурарин мянфяаьтлувал ис хьуз гъидритбиина ва дурар сагъ-саламатди, чагъди кьюрд’ан адаъбиинна жалб дапIна».
