Зубайдат Шябанова
Гьаму йигъари Южно-Сухокумск шагьрин администрацияйин главайин заместителин гъуллугъниина ихь ватанагьли Минажат Рягьимовна Мурадова тяйин гъапIну. Дугъу муниципалитетдиъ социалин циркил кIули гъабхиди. Минажат Мурадовайин кандидатура думу гъуллугънаъ Дагъустандин правительствойиъ тасдикь гъапIнийи.
Минажат Мурадова 1964-пи йисан Табасаран райондин Дагъни гъулаъ бабкан гъахьну. Дугъу ДГУ-йин филологияйин факультет ккудубкIну.
1991-пи йислан 2000-пи йисаз Туркменистан Республикайин Теджен шагьриъ 6-пи нумрайин мектебдиъ урус чIал ва литература кивру мялимди гъилихну. 2001-пи йислан 2016-пи йисаз РД-йин культурайин министерствойин дахилнаъ айи Республикайин халкьдин яратмишарин хулаъ (РДНТ) мялуматарин ляхнин ва репертуаринна чап апIбарин отделин редакторди, методистди, аьдати культурайинна фольклорин отделин пишекарди, РДНТ-йин тешкиллувалинна методический ва кадрйирин ляхнин отделин заведующийди гъилихну, хъа 2016-пи йислан 2023-пи йисаз гьадму идарайиъ халкьдин яратмишарин отдел кIули гъабхури гъахьну.
Минажат Мурадова Дагъустан Республикайин культурайин лайикьлу гъуллугъчи ву.
«Узу му гъуллугъниина гъюруваликан затра фикир апIури гъахьундайза. Инсанари кIуруганси, уьмри рякъ гьаци ккабалгну. 1-пи августдихъанмина узу дистанционный къайдайиинди цIийи ляхнихъ хъюгънийза. Социалин блок узуз багахьди таниш вузуз. ИкибаштIан, цIийи гъуллугънаъ ляхинра гизаф а, жавабдарвалра аьхюб ву. Хъа узу улихь дивнайи метлебарихъ хъуркьри ва месэлйир гьял апIру рякъяр агури вердиш вуза. Гьаддиз читинвалар хьидар кIури миж кайиз», – гъапну ич сюгьбатнаъ Минажат Мурадовайи.
