Санкт-Петербургдиъ чпин пишекарвалин рякъюъ баркаллуди зегьмет зигури, агьалйирин терефнаан аьхю гьюрмат гъазанмиш дапIнайи, шагьриъ медицинайин кIакIначи пишекрарси гьисабназ гъадагънайи дагъустанлуйирин – духтир-нейрохирург Эльдар Аьгьмедовдин, уролог Мягьямед Акаевдин, хирург Мягьямед Аьбдуллаевдин (гьамусяаьт Дагъустандиъ Мягьячгъала шагьрин 1-пи нумрайин больницайин кIулин духтирди лихура), травматолог – Гьямзат Гьяжиевдин – ччвурар, шагьриъси, вари Урусатдиъра бажаранлу, чпин ляхин дериндиан аьгъю, тярифназ лайикьлу духтраринси машгьур духьна.
Гъийин йиз макьалайиъ чан ляхнин тажрубайиъ 2 агъзуртIан артухъ медицинайин лап гъагъи, заан нанотехнологияйин операцйир кIули гъуху ихь ватанагьли Эльдар Аьгьмедовдикан бикIуз ккундузуз.
Санкт-Петербург шагьриъ Эльдар Аьгьмедовдихъди таниш дару вая дугъкан деребхьу кас гьеле-меле хьуб мумкин дар. Аьдати инсанар, бажаранлу духтрар дугъкан гъизилин хилар хьайи, аьяндар духтриканси улхуру.
Эльдар Аьгьмедович Дагъустандин Дербент райондин Митягъи гъул’ан ву. 2003-пи йисан Дагъустандин медицинайин академия ккудубкIну, думу Санкт-Петербург шагьриъ интернатурайик кучIвру. Гьаддихъан мина Эльдар Аьгьмедов гьаму шагьриъ лихура. Му пише Эльдру хабарсузди ктабгъуб дайи. Дугъан адаш Аьгьмед Аьгьмедов РД-йин лайикьлу духтир ву. Адаш Дербентдин больницайиъ бицIидарин духтирди, Чинар гъулан больницайин кIулин духтирди, хъасин Падар гъулаъра гъилихнийи.
Мектебдиъ урхури амиди Эльдран духтирвалин пишекарвалихъ юкIв хъайи. Адаш ляхниз гъушубси, бали дугъан медицинайин уьзрарикан дибикIнайи дафтрар, гьацира медицинайин илмарин китабар ахтармиш апIуз, урхуз хъюгъри гъахьну. Мектеб заан кьиматариинди ккудубкIу жигьилиз медицинайин академияйиъ урхруганра читинвалар алахьундайи.
Эльдар Аьгьмедовдихьна, Санкт-Петербургдианси, Азербайжан ва Кафари Кавказдин вари республикйириан агьалйир илтIикIури шулу. Думу Санкт-Петербургдиъ В.А. Алмазовдин ччвурнахъ хъайи медицинайин ахтармишар гъахру Урусатдин Милли центриъ нейрохирургияйин отделениейиъ кIулин пишекар, духтир-нейрохирургди 2006-пи йисхъан мина лихура. Саб вазлин арайиъ дугъу 200-дихьна операцйир апIура. Анжагъ саб Дагъустандиан вазлин арайиъ 15-20 касдиз кюмек тувра.
«Бязи вахтари Кафари Кавказдин республикйириъ медицинайин кюмек дибрихъу агьалйир учухьна илтIикIуру. Ич центриъ дурарин бедендин аьгьвалат ахтармиш дапIну, эгер дурариз, дугъриданра, медицинайин заан технологияйин операция вая сагъ апIувал лазим вуш, кагъзар гьязур дапIну, кюмек тувру. Центриъ квотйирин отдел ляхник кипна. Гьадушваъ учухьна илтIикIу касарин документар уч апIуру, ва думу кас фунуб республикайиан, областдиан вуш, гьадушв’ан квота тувуб тIалаб апIуру. Мисалназ, узухьна кюмек ккун апIури илтIикIу кас кьабул апIуз ва дугъаз узхьан удукьру кюмек тувуз фунуб вахтнара гьязур вуза. Хив ва Табасаран районарианра ихь агьалйир кми-кмиди илтIикIури шулзухьна. Магьа накьра Хив райондиан вуйи сар касдиз заан технологияйин кюмек чарасуз лазим вуди зенг гъапIну. Гьамусяаьт думу Мягьячгъала шагьрин больницайиъ ккаъна.
Ихь республикайиъра бажаранлу духтрар а, амма нейрохирургар вари уьлкейиъ гьуркIрадар. Нейрохирургдин пише медицинайиъ варитIан гъагъи пишеси гьисаб апIуру. Саб суткайин арайиъ 6-8 операция апIру вахтар гъахьнийиз. Фунур вушра духтрихьан гьаму гъагъ аьгь апIуз шулдар. Хъа инсандин уьмур духтрин хилиъ айиган ва думу уьмриз бицIи манзилтIан ва мумкинвалтIан амдруган, сяътар, суткйир, рягьятвал гъадабгъбакан вуйи фикрар вари кIваълан гьягъюру. Бязи лап гъагъи операцйир, мисалназ, кIулин маълин, юкьян гьарин ва гьацдар жарадар, 10-12 сяаьтна гъахру вахтар шулу. Йиз уьмур операцйир апIру столихъ гъябгъюрайиз, амма му пише ктабгъувалиин саб дакьикьайиъкьан швумал гъахьундарза. Йиз адашдиси, узуси, йиз веледарира гьаму пише ктабгъур ва дурар инсанарин сагъ’валин гъайгъушнаъ шул кIури, миж кивуз ккундузуз», – гъапну Эльдар Аьгьмедовди.
Гьаци хьибдира ву, фицики Эльдар Аьгьмедовичдиз кьюр велед а. Гележегдиъ дурарра, гъи чпин адашси, Урусатдин регионариз, харижи уьлкйириз операцйир апIуз гъягъру ва конференцйириъ иштирак хьпан теклифар кьабул апIру, бажаранлу духтрар хьуб мумкин ву. Хъа гьелелиг дурар, адаш хул’ан удучIвубси, медицинайин илмарин китабар урхбиин машгъул шула.
