Гьюрматлу бицIидар ва студентар, мялимар ва абйир-бабар! Улубкьнайи 1-пи сентябрь – Аьгъюваларин Йигъ учвуз кIваантIан тебрик апIурача.

 

1-пи сентябрь сабпи ражари мектебдин сабпи классдиз, урхбан заан ва кьялан заведенйирин сабпи курсариз гъягъюрайидариз, хьадан тятIиларин кьяляхъ чпин юлдшарихъди гюрюшмиш шулайи баяр-шубариз аьхю машквар ву. Гьаму кьадар кюкйирин кунцIар, рангнан шарар, цIийи тетрадар ва китабар гьич саб жара машквриъкьан шулдар. Думу машкврихьна, бицIидарси, аьхюдарра гьязур шулу. Мюгьтал хьузра себеб адар – ухьу вари фила-вуш мектебдиз гъушдар вухьа, гьарсар касдин уьмрин рякъ, вари ихь хъуркьувалар мектебдин гьяятдилан ккергъну.

Мектебдиз гъягъюрайи бицIидар ва студентар! Гъит гьаму цIийи урхбан йисандин вахтну учвуз дерин аьгъювалар туври, сабпи классдиз гъягъюрайи ихь веледарин аьгъюваларихьна вуйи рякъ акуб, шадуб, рягьтиб ибшри. Аьгъдруб аьгъю апIинай, аьгъювалар уьмрин хъуркьуваларин бина вуйиваликан кIваълан магьапIанай.
Гьюрматнан асас гафар мялимариз, классар кIули гъахурайидариз дарпиди гъитуз шулдар. Ичв пишекарвали, тажрубайи, аьгъювалар тувбаъ ишлетмиш апIурайи деврин технологйири образованиейин гъурулушдин циркил ужуди артмиш апIура. Гьарсар бицIирин мумкинвалар ачухъ апIувал, дурариз вари терефарихъан дерин аьгъювалар тувувал, лайикьлу наслар тербияламиш апIувал, гележегдиъ пише ктабгъуз кюмек тувувал-ичв улихь дийигънайи важиблу месэлйир ву.

Гьюрматлу мялимар, учвуз ляхниъ заан хъуркьувалар, бажаранлу ва гьюрмат уьбхру ученикар ишричвуз, хъа абйир-бабариз, чпин веледарин хъуркьувалари гьаммишан шад апIру агьларикан хьувал ккун апIурача.

Газатдин редакцияйин коллектив