Зубайдат Шябанова,
Мейлан Нежефов
Урусатдиъ гьамусяаьт уьмриз кечирмиш апIурайи «Образование» милли проектдин «Деврин мектеб» федеральный программайин дахилнаъди гьаму гьяфтайиъ Табасаран ва Хив районариъ цIийи «Точка роста» центрар ачмиш гъапIну.

Табасаран райондиъ му деврин кабинетар Гуми, Жвулли, Цухтигъ, Дагъни, Рушвул, Улуз, ЦIурутIил ва ЦIанак гъуларин мектебариъ арццну. Гьамусяаьт райондиъ, образованиейин идарйирин бинайиин алди, 41 «Точка роста» центрар лихура. Дурарикан 6 центр цифровой ва гуманитарный цирклиндар, хъа имбу 35 – илимдинна технологияйин рякъ’ан ву.
Табасаран райондин образованиейин управлениейин кIулиъ айирин тербияйин ляхнин ва аьлава образованиейин цирклиан заместитель Эсмира Халидовайи ич сюгьбатнаъ къайд гъапIганси, «Точка роста» центр – физикайин, химияйин, биологияйин кабинетариз деврин авадлугъар айи образованиейин цIийи майдан гьисаб шула. Ужуб тажруба айи мялимарин регьберваликкди урхурайидарихьан ахтармишарин ляхниин машгъул хьуз, опытар гъахуз, мастер-классар тешкил апIуз ва чпин хусуси проектар аьмалназ хуз шулу. Дидланра савайи, урхурайидарихьан му центрариъ чпин мумкинвалар ачмиш апIуз, цIийи аьгъювалар гъадагъуз, хъа выпускникарихьан практический пайнаан вуйи имтигьяндихьна гьязур хьуз хьибди.

Хив райондиъ цIийи центр Ляхлаарин кьялан мектебдин бинайиин абццну. Мектебдин директор Вадим Межидовдин гафариинди, мектебдин кьюб кабинетдиъ рас апIбан ужудар ляхнар кIули духнайи. «Магьа саб кабинетдиъ физикайин, хъа тмуну кабинетдиъ химияйин ва биологияйин дарсариз лазим вуйи лабораторияйин гьякь-гьисаб дубхначуз. Ав, мектебдиъ му центр абццувалихъди аьлакьалу вуди, 48 урхурайидаризси, дурарин абйир-бабаризра, гъирагъдилан технологияйихьна иштагь айи касаризра «физика», «химия», «биология» предметариан ва гьацира XXI аьсрин ТСО-йин ва ИКТ-йин аьгъювалар гъадагъуз мумкинвал хьибди. Центр ачмиш апIувалихъди сабси мектебдиъ урхурайи баяр-шубари гъадагъурайи аьгъюваларин дережара, ерира за шул кIури, умуд кивраза», – къайд апIура мектебдин директори.