Гюльнара Мягьямедова
Сентябрин 27-пи йигъан Москвайиъ Урусатдин гьамусдин деврин тарихдин гьюкуматдин музейиъ, Расул Гьямзатовдин 100 йисандин юбилейин серенжемарин дахилнаъди «Йиз Дагъустан. Ихь Расул» выставка ачмиш гъабхьну. Серенжем музейдин генеральный директор Ирина Великановайи кIули гъубхнийи. Серенжемдиъ Дагъустандин Глава Сергей Меликовра иштирак гъахьну.
«Расул Гьямзатовдин юбилейдиз бахш вуйи культурайин серенжем ихь уьлкейин тарихдихъди аьлакьалу вуйи варитIан багьалу экспонатар айи музейдиъ гъабхувал лишанлу ву. Расул Гьямзатов Дагъустандин культурайин тарихдин пайси, вари ихь уьлкейин тарихдиъра лайикьлу йишв дибиснайи кас ву. Узу, ихь ватанагьлийиз гьамциб фикир тувувализ дилигну, уьлкейин культурайин министерствойиз, Москвайин правительствойиз вари дагъустанлуйирин терефнаан чухсагъул мялум апIураза. Урусатдин гьамусдин деврин тарихдин музейдин зализ гъюз думукьан рягьят дар. Хъа Расул Гьямзатов гъуланси, вари планетайин шаир вуйивалин гъавриъ ахьа. Дагъустандин экспозиция Москвайин агьалйиризра, меркездин хяларизра маракьлу шул кIури, умуд кивраза», – илтIикIну Сергей Меликов выставка тешкил гъапIдарихьна.
«Выставкайиъ ихь культурайин гизаф циркларин экспонатар а: скульптурйир, графика, шиклар, ругдин гъабар, халачйир. Гьаму вари экспонатар сар касдин ччвурну сатIи дапIна. Музейдин гъуллугъчйириз чухсагъул мялум апIураза, ичв кюмек дайиш, гьаму проект кIулиз адабгъуз читинди хьибдийи», – гъапнийи Дагъустандин искусствйирин музейдин директор, Расул Гьямзатовдин риш Салихат Гьямзатовайи.
Экспозицияйиз лигбан кьяляхъ Дагъустандин кIулиъ айири чан фикрар ачухъ гъапIну ва Музейин гьюрматлу хяларин китабдиъ чан цIарарра гъитну.
28-пи сентябриъ Москвайиъ Гьюкуматдин Кремлийин дворецдиъ шаирин 100 йисаз бахш дапIнайи музыкайинна театрин литературайин сягьна улупбанди ву. Душваъ Дагъустандин культурайин гъуллугъчйирси, уьлкейин жара регионарианра машгьур артистар иштирак хьиди.
Серенжемдиъ уьлкейин Президент Владимир Путин, Урусатдин правительствойин кIулиъ айи Михаил Мишустин, Дагъустандин глава Сергей Меликов ва жара гьюрматлу хяларра хьиди. Концертдин программайиъ Расул Гьямзатовдин шиърариз дидикIнайи машгьур мяълийир «Йиз даф», «Уьрхяй дустар», «Долалай», «Дада», «Кьарнийир» «Дагълуйирин гимн» ва жарадар урхиди.
