Ухьуз мялум вуйиганси, ктабхъурайи 2019-пи йис вари Урусатдиъ театрин Йисси тяйин дапIна. Гьаму йигъари Хив райондиъ, театрин Йис аьхирихъна дуфнайиб субут апIури ва дидин натижйир йивури, райондин культурайин хулаъ мярака кIули гъубшнийи.
Чпин ляхин-карнахьан вахт дабг- ну, мяракайиз тамаши апIуз дуфнайи халкьдиз, гъулариан дуфнайи хялариз ва райондин администрацияйиз чухсагъул мялум апIури, серенжемдиъ райондин культурайин, спортдин, жигьиларин политикайин ва туризмдин отделин начальник Казбек Къазиев удучIвну гъулхнийи. «Вари Урусатдиъ къайд дапIнайи, ктабхъурайи театрин 2019-пи Йис, йиз фикриан, ихь райондиъра баркаллувалиинди кIули гъубшну. Фицики, 10-12 гъулан культурайин хулариъ швнуд-сад йисариинди ккилигурайи рас апIбан ляхнар тамам гъапIунхьа. Мидланра савайи, райондин халкьдин театри, 12-15 гъулаз театр ва концерт гъабхури, агьалйириз шадвал тувну. Республикайин вари пIипIариъ гъахурайи шадвалин мяракйириъ лайикьлуди ва баркаллувалиинди иштирак шули, райондиз лайикьлу йишвар ва чухсагъул мялум апIру кагъзар гъахунхьа. Ужуб албагу йиз коллективдиз, райондин халкьдин театриз ва гъулариъ культурайин хулариз регьбервал туврайи директорариз ва художествойин самодеятельностдин руководителариз зурба вуйи чухсагъул пуз ккундузуз. Фуну вахтна узу илтIикIишра, кIулиъ глава Ярмет Ярметов ади, гьар вахтна узуз хил гьачIабкку райондин администрацияйиз хъана аьхю чухсагъул пуз ккундузуз. Эгер кудухнайидарин варидин метлеб саб гъабхьундайиш, гьелбетда, тешкил дапнайи театрин Йис мицистар лайикьлу натижйириинди кIули гъабхуз шулдайи. Ва йиз улхбан аьхириъ пуз ккундузузки, учву ктабхъурайи театрин Йис аьхирихъна гъюра кIури, райондин халкьдин театрин ляхинра гьамдиинди ккудубкIура пну, фикир мапIанай. Ваъ, ухьу ихь райондиъ ва республикайиъ кIули гъягъру вари мяракйириъ иштирак хьидихьа, улупнайи йисандин бегьер гьацдар хъуркьувалариинди давам апIидихьа. Чухсагъул!»
Казбек Зейнудинович улхбан кьяляхъ райондин халкьдин театри Манаф Шамхаловдин «Сижар» кIуру эсериан вуйи сягьна улупнийи ва уч духьнайидарихьди театр – халкьдин юкIв вуйивал гьисс апIуз гъитнийи.
Мяракайин аьхириъ райондин глава Ярмет Ярметов удучIвну гъулхнийи. «Ихь райондин агьалйирихьди, администрацияйин вакиларихьди мициб мянфяаьтлу шадвалин мяракайиз тамаши апIуз гъиту учвуз ва райондиз бегьер хури учву алдагъурайи ликариз чухсагъул ва икрам! Гъит, ихь райондиз ва ихь халкьдихьди шадвал апIуз гъитуз учвуз хъана кьувват туври! Ихь райондин телевидениейиан му театриз райондин миди вуйи агьалйирира тамаша апIур пну, узу умудлу вуза. Баркаллагь учвуз ва ичв коллективдиз!»
Гьелбетда, аьдат вуйиганси, райондиъ мицисдар шадлугънан мяракйир, пешкешар, чухсагъул мялум апIру кагъзар, кюкйир туври, аьхирихъна гъюру. Му мяракайиъра исихъ улупнайи касар «Хив район» МО-йин Гьюрматнан кагъзариинди, пешкешариинди, кюкйириинди лишанлу гъапIнийи: РКДЦ-йин халкьдин театрин режиссёр Ферида Байрамова, Гъвандикк гъулан культурайин хулан художествойин самодеятельностдин руководитель Гарибан Рамазанов, РКДЦ-йин солист Лида Гьясанова, РКДЦ-йин художествойин самодеятельностдин руководитель Кябир Гьяжиев.
