Мейлан Нежефов
Улихьна йигъари Хив райондиъ Хив гъулан спортдин мектебдиъ РСФСР-ин лайикьлу тренер, СССР-ин спортдин мастер (арха-бинайиинди райондин Ккугъ гъулан агьали) Жабраилов Сидир Жабраиловичдин рюгьяриз бахш вуйи юкьяр дисбаан талитар кIули гъухну.
Талитариъ 2007-пи йислан 2012-пи йис’ина гъяйиз вуйи 80-лан зиина живанар иштирак гъахьнийи, гьадму гьисабнаан гъунши Табасаран, СтIал Сулейман, Кьурагь районарианра.
Му йигъан райондиз тешкил дапIнайи талитариз тамаша апIуз саб десте хяларра дуфнайи. Дурарин арайиъ Сидир Жабраиловичдин хиликк спортдиин машгъул гъахьи ва тербия гъадабгъу ва гъи пишекарвалин рякъюъ заан хъуркьувалар гъазанмиш дапIнайи спортсменарра айи: РД-йин спортдин министр, РФ-дин спортдин лайикьлу гъуллугъчи Сажид Сажидов, уьлкейин чемпион Мягьямедхан Арацилов, СССР-ин спортдин лайикьлу мастер, вари дюн’яйин Кубокдин сагьиб Бузай Ибрагьимов, спортдин мастер, Урусатдин лайикьлу тренер, ДГТУ-йин физкультурайин кафедрайин заведующий АбутIалиб Кьуршалиев, СССР-ин спортдин мастер, «Каспий-лада» АО-йин директорарин советдин председатель Закарья Аьлимурзаев, турнирин аьхюну судья Убайдула Уьсманов, Халкьдин Собраниейин депутат, СВО-йин иштиракчи Расим Гьяжиагъаев, «Строй-Лифт» ООО-йин генеральный директор Тажудин Мазанов ва гь. ж.
Мидланра савайи, талитарин тешкилатчйирин теклифниинди судйирин вазифйир кIули гъахуз Бурятияйиан Юлия Бумбошкина, Къизилюрт шагьриан Мурад Аьбдуллаев ва Хасавюрт шагьриан Аьбдулла Къазанбиев дуфнайи.
Серенжем абццри, райондин кIулиъ айи Ярмет Ярметовди меркездиан дуфнайи хялариз ва чпин ляхнар-карар гъитну тамам ваIуз дуфнайи гьевескрариз, чухсагъул мялум гъапIнийи. Чан улхбаъ дугъу Сидир Жабраиловди аргъаж шулайи наслар сагъу уьмрихьна жалб апIбан ляхниъ гъибту шилнакан ва заан пишекарвалин спортсменар гьязур апIбаъ гъизигу жафайикан ктибтнийи.
Главайин кьяляхъ имбударира чпин улхбариъ спортди инсандин уьмриъ уйнамиш апIурайи роликан ктибтури, турнирин иштиракчйириз цIийи таниш’валариз, дуствализ ккиришрар ккиву му йигъ тебрик ва дурарикан гьарган сагъламвал уьбхбан гъаразнаъ хьуб ккун гъапIнийи.
Турнирин иштиракчйир, чпин гъагъназ лигну, 8 дестейиз жара гъапIнийи. Натижйирикан улхуруш, командйирин арайиъ варитIан гизаф сабпи йишвар – юкьуб – Хив райондин живанари – Султан МутIалибовди (35 кг), Арсен Мурадхановди (55 кг), Руслан Рамазановди (60 кг) ва Салим Аслановди (69 кг) гъазанмиш гъапIнийи, шубуб сабпи йишвар Табасаран райондиан вуйи спорт-сменари – Эседуллагь Мягьямедовди (45 кг), Мягьямед Гьямидовди (51 кг) ва Амир Аслановди (64 кг), сабсан сабпи йишв – Кьурагь райондиан вуйи Гьяжимурад Эмирбеговди (41 кг) гъадагънийи. Хъа турнириъ гъазанмиш гъапIу пешкешнан йишварин уьмуми гьисаб гъабхуруш, сабпи йишв Табасаран ва Хив райондин командйири пай гъапIну – йицIикьюкьюб медалар, кьюбпи йишв – СтIал Сулейман райондин спортсменари (6 медаль), шубубпи йишв Кьурагь райондин спортсменари (саб медаль) гъидисну.
Вари гъалибчйир ва пешкешнан йишвар гъидису спортсменар медалариинди, администрацияйин терефнаан чухсагъул мялум апIбан гьюрматнан кагъзариинди ва пулин конвертариинди лишанлу гъапIнийи.
