Гьарсаб хизандиъ, велед дюрхну, думу алабхьрубдихъди ва ипIрубдихъди тямин апIуб, дугъаз тербия ва билиг тувуб, дугъаз харжибдихьан ужуб жара апIуз улупуб, вахт гъафиган, эвленмиш дапIну, думу хулан-йишван ва ляхин-карнан эйси кадаъну инсанарин дестейиъ тIауб абайинна бабан аьхю мурад-метлеб ва асас буржйирикан саб ву.
Гьадму асас буржи тамам апIури, Мамедгъалайиъ яшамиш шулайи Балабеговарин хизанди улихьна йигъари чпин велед эвленмиш гъапIнийи. Узура му хайирлу ляхниъ иштирак гъахьнийза. Ав, сумчрин ипIуб-убхъубдиз, кьавларин устадвализ, мярака гъабхурайи чавшиз, ликри-кIул’ин алидариз ва гьиври-гьадабгъурайидариз гаф адайи. Маншаллагь!
Хъа анжагъ сикинвал фтиз кIуруш аьгъдру гъийин заманайиъ сумчрихъан варидиз сабси сумчрин тIяаьм дяргъюрайивал сабсан ражну ачухъ гъабхьнийзуз. Бай хусуси метлеб айи дявдин операцияйиъ иштирак шулайи йиз сюгьбатчи Бики Гьямидовайин му йигъандин шадвалра, пашманвалра гъибикьнайи гьиссарикан учвуз ктибтуз ккундузуз.
«Йиз чуччуз гъи эвленмиш гъахьи жигьил кьюр шурахъди айи сар жили велед ву. Шюкюр ибшри Аллагьдиз, ужи-харжи му йигъра улубкьну. Шадвали юкIв уьлдюбгъюрашра, думу пай апIуз ва улупуз жандиъ кьувват адариз. Йиз бай яд уьлкейиъ гюллйирикк ккайиз. ЮкIв фагьмар-фикрари cефил дапIнайи йиз гевюлин гьавйирикан ва нивгъари ацIнайи уларикан чуччуз мялум дархьуз вари чарйир агураза. Хъа дугъан улар гьарган уз’ин алди шулу. Учу, аьдати чйирсира дарди, кьюдюхрар вуча. Ич арайиъ садар терезарихьанра гъадабгъуз даршлу шадвалра, пашманвалра сабси пай апIурача. Гъи йиз ибарихьан мукьмин сес гъадабгъуз даршули, ликариз дидихъди гъягъюз ккунди адашра, ялхъвниъ чуччухъди саб чарх йивуз мажбур гъахьунзу. Му йигъ улиъ уьбхюри, 26-27 йис вуйич. Чуччу ва дугъан уьмрин юлдши, сумчриз увуз дих фици апIуча, дарапIди фици гъибтча кIури, узуз зенг гъапIнийи. Мидланра савайи, саб артухъ мукьамра иливуз иштагь амдарич, гъапнийи. Гьадмуган дурариз жаваб гъапIнийза, гъюзра гъюрза, ялхъванра апIурза, кIури. Хъа думугандин кьувват гъи, йишв’ин алабхъиган, кьит гъабхьнийиз.
Валлагьи, cар узу дар. Инсанарихьан швушвахъ хъайи муртйирихъан, пеэрихъан ва мани шюрйирихъан тIяаьм гъадабгъну, дурариз сумчрин мешребар ва лишнар ву пуз шули адар. Яснан палат алабхьнайидарси, вари кIарубдиъ учIвна. Ялхъвниз удучIву саб дакьикьайин арайиъра кмиди хилиъ телефон айиз, гьамус-хъа балихьан зенг гъюр кIури… Гъит гьарган айидар ухьуз сумчрар ишри, жигьиларин гележег акуб ва нурлуб ибшри. Миллетар жара дарапIри, инсанарин арайиъ сигъ аьлакьа ва мясляаьтнан сабвал ибшри. Дадйирин кIваз сабур туври. Аьхюдаринра кIваъ рягьим иври. ЦIийи йисаз ихь хулариъ ва юкIвариъ гъалибвалин хабар атIабгри!» – гъапнийи игитрин дада Бикийи.
