Зубайдат Шябанова
Дагъустандин агьалйири Сектор Гъазайиан гьергуз мажбур духьну гъюрайидар жанлуди кьабул апIура. Ихь хайлин ватанагьлийири Палестинайиъ йитим гъахьи бицIидар чпиз веледарди гъадагъуз айи ниятарикан кIура.

«Учуз Дагъустандин районариан, шагьрариан ариш-вериш гъабхурайи карханйирин, автозаправкйирин станцйирин ва жара алвер апIру аьхю туканарин ва тешкилатарин кIулиъ айидарихьан сикин дарди телефондин зенгар гъюрачуз. Дурари, Палестинайиан гьергну дуфнайидариз кюмек апIуз ккунди, дурарин палатдин ва ликариин алахьрударин кьадарар, итIру сурсатарикан фу лазим вуш, вари гьерхра. Мидланра гъайри, йитим гъахьи бицIидар чпиз веледарди гъадагъуз ккуни хизанарра гизаф а. Гьелелиг дугъри жаваб тувуз шуладарчухьан. Мидкан гафар апIуз сабан ухди ву. Республикайиз дуфнайи гьарсар аьхюриина ва бицIириина хусуси социальный паспорт абццру, ва думу паспортдин бинайиин алди, хъасин ич ляхинра ккебгъдича», – къайд гъапIнийи РД-йин зегьметнан ва яшайишдин артмиш’валин министерствойин пресс-гъуллугънан кIулиъ айи Надия Жамалудиновайи.
Йитим гъахьи бицIидар веледарди гъадагъбан кьастар ихь халкьдин лап аьхю жумартвалин ва эдеблувалин лишнарси гьисаб апIураза. Узу йиз багъри табасаран халкьдихьна, дурарин арайиъра Палестинайин йитимариз азадвал ва ислягьвал, хизандин манишин ва умунвал тувуз шлу гьевес айидар аш, миннат апIури, илтIикIураза.

Хайлин йисарин дявйири ва мягьрумвалари къагънайи думу бицIидар ислягьвализ ва саламатвализ ккарагура. Йитим бицIириз мани хал, адашдин ва дадайин гьюрмат ва тербия, образование ва гележегдиз аку рякъ, гъайгъушин тувубтIан артухъ заан рягьимлувал адаршул. Гъачай Палестинайин йитим бицIидарин уьмур сатIиди аку апIурхьа. Дурар ислягь уьмриз ва азадвализ лайикьлу ву. Дагъустандиъ дурари бахтлу уьмур ккебгъбак ихь пайра кивурхьа.