Наргиз Гюлечова
Гьар йисан, кьюрдун фасил ккебгъубси, республикайин агьалйир энергетикарикан асиллувалиъ ахъру, фицики чпиз ккуни вахтна дурари аквар кархьрира ву, ктIушвурира. Магьа кьюб гьяфтайин арайиъ зат хътудубтIди убгъурайи мархьар себеб духьну, Мягьячгъалайиъ хайлин микрорайонариъ яшамиш шулайи агьалйири мучIу ва даргънайи хулариъ аьзиятар зигура. Му аьгьвалатнахъди аьлакьалу вуди, 12-пи декабриъ Дагъустандин РИА-йин конференцйир гъахру залиъ яркьу конференция кIули гъубшну. Конференцияйиъ Дагъустандин энергетикайин ва тарифарин министр Марат Шихялиев, «Дагэнерго» АО-йин кIулин инженер Гьяжи Гьяжиев, Мягьячгъалайин ЖКХ-йин управлениейин кIулиъ айирин заместитель Сайгидгьюсейн Мягьямедов ва хъанара жара касар иштирак гъахьнийи.
Серенжемдин эвелиъ, августдин вазли республикайиъ аквар ктIушвбахъди гъахьи гьядисйир кIваин апIури, Марат Шихялиевди Дагъустандин кIулиъ айир Урусатдин Президент Владимир Путиндихьна, цирклиъ чарасуз вуйи расвалин ляхнар гъахбаз кюмек ккун апIури илтIикIбакан ктибтнийи. ИкибаштIан, му ляхнар кIули гъахбан бадали, республикайиз субсидйир жюрейиинди 1 миллиардна 200 миллион манатдин пулин дакьатар тувну. Кьюрдухьна гьязур хьпан бадали деетнайи гьаму дакьатарикан 870 миллион манат Мягьячгъалайин акварин циркил рас ва цIийи алапIбаз харж апIбанди ву.
«Гъийин йигъаз республикайиъ аквар дизигнайи симар, бурузар ва гьацира трансформаторар саки 70-75% йирси духьна. Аьгьвалат дигиш апIбан бадали, му месэлайин зиин гьамусяаьт лихура ва думу ляхин республикайин Главайи чан гюзчиваликкна гъадабгъна. Акварихъди вуйи му читинвалар арайиз гьамус дуфнайидар дар, дурар швнуд-сад йисариинди айидар ву. Гьаддиз, агьвалат ужуб терефнахъинди дигиш апIбан бадали, республикайин Правительствойина «Россети – Кафари Кавказ» ПАО-йи сатIиди вуйи программа тартиб дапIну, цирклин расвалин ляхнарин серенжемар кIули гъахуз хъюгъна», – гъапну министри.
Мягьячгъала шагьриъ гьар йигъан ктIушвурайи акварин гьякьнаан «Дагэнерго» АО-йин кIулин инженер Гьяжи Гьяжиевди туву мялуматариинди, гьамусяаьт хулариз манишин тувру фасил ккебгъну ашра, гьелелиг йирси духьнайи электрик симар гьюдюхну ккудукIнадар. Ляхин йигъ-йишв дарпиди апIура, аммаки, аьгьвалат лап читинуб вуйивализ лигну, улупнайи вахтназ ляхнар аьхирихъна хуз хъуркьрадар.
«Гъахурайи ляхнар 29-пи декабризкьан давам хьиди. Гьаддихъан, цIийи йисаз тувнайи, дилихру йигъарин арайиъ, пландиинди вуйи аквар ктIушвувал вахтназди дебккра. Машквран йигъарин кьяляхъ, расвалин ляхнар хъанара давам апIиди.
Мягьячгъалайиъси, читин аьгьвалат айи жара муниципалитетариъра симар, бурузар ва трансформаторар гьюдюхбан ляхнар кIули гъюгъюра. Хъюгънайи ляхин чан аьхириз тамам дарапIкьан гагьди, гьич саб аварйирин бригадакьан ляхнихъан хътакурадар. Саб гафниинди, дурар я микI-мархь, ясана йишв-йигъ дарпиди лихура.
Къайд апIуз ккундузузки, гъи ухьуз федералин бюджетдиан дакьатар тувундайиш, му ляхнар апIуз шулдайи, фицики, гьаму йисан 1-пи ноябриз вуйи улупбариинди, ишлетмиш гъапIу акварихъанди республикайин агьалйир «Дагэнерго» АО-йин улихь 10 миллиард манатдин буржлу духьна. Гьацдар буржар кайивалиан, расвалин ляхнар гъахузра шуладар», – гъапну тешкилатдин кIулин инженери.
Гьяжи Гьяжиевдин гафариинди, гъийин йигъан республикайин меркездин акварин циркил цIийи алапIбан ляхнариъ 35 энергетикайин бригадайи ляхин апIура. Ляхин апIурайи вахна хатIасузвалар дархьбан бадали, пландиинди вуди кючйириъ аквар ктIушвура.Цирклиъ расвалин ляхнар гъахбан бадали республикайиз тувнайи дакьатар хъуркьхъанмина, Мягьячгъала шагьриъ 13 трансформатор дивнайи подстанцйирин кьувват артухъ гъапIну.
