Мейлан Нежефов

Йисан аьхириъ гьарсаб идарайиъ чан ляхниъ заан хъуркьувалар улупу пишекрар лишанлу апIуб ужуб ляхин ву. Учв фицдар яшариъ ашра, му ляхни дурарик гьевес капIру, хъана артухъдиси, жавабдарвалин гьисс ва юкIв капIру.

 

Узу гьарган фикир апIури шулза: эгер, гвачIнинган гъудужву инсан, маш-хил дижибкIну, ушв гьибтбалан кьяляхъ аьхю аьшкьниинди ляхниз гъягъюруш, хъа хябяхъган, гьациб гьава жандиъ имиди, чаз ккилибгурайи мани ялав айи хулаз кьяляхъ гъюруш, дицир инсан бахтавар ву. Уьмрин мяна вари гьамдиъ адаринхъа?!
Гьацдар бахтаврарикан сар ву пуз шулу Хив райондин имамарин советдин председатель Шябан-гьяжи Салигьовра. Думу кIулиъ ади дугъан гъарашугъари гъи райондин динагьлийирин арайиъ гъабхурайи ляхин садар терезарихьанра гъадабгъуз шулдар.
Гьаму гьяфтайиъ Мягьячгъалайиъ гъабхьи «Ас-салам» газатдин йисандин натижйир йивбаз бахш вуйи мажлисдиъ, райондиъ гъабхурайи чпин ляхниз лигну, дурар Кьибла Дагъустандиъ 2-пи йишван сагьибар гъахьну.

«Гьелбетда, йишвар тувруган жигьиларихъди, райондин агъсакъларихъди, мектебариъ аргъаж шулайи баяр-шубарихъди гъабхурайи ляхин ва лекцйир гьисабназ гъадагъну. Гьацира райондин вари гъулариъ яркьуди гъахурайи мажлисар ва газатдин подпискара. Мидланра савайи, райондиъ ерлешмиш дубхьнайи «Инсан» фонднан терефнаан вуйи улупбарин натижйирра харжидар дар. Райондиъси, кIулди вари республикайиъ гъахурайи серенжемариъра сабишв’инди иштирак шули, кюмекназ бакар хьуб гъи ич буржйирикан саб вуйиб гьисс апIури, ликар алдагъурача. Учуз туву кьюбпи йишвак саки вари райондин агьалйирин пай ка. Гъит ихь арайиъ айи чвевалин ва дуствалин гъала мюгькам ва гужал ибшри. Сабвахтнара инсанвалин сар-сарихьна айи гьякь-гьюрматнан ва хъугъвалин шартIарихъ ухьу мягьрум даришри», – гъапнийи ич сюгьбатнаъ Шябан-гьяжи Салигьовди.