Мейлан Нежефов
Украинайин ругариин давам шулайи хусуси метлеб айи операцияйиъ заан жюрэтлувал улупдарин арайиъ йиз гъийин макьалайин игит Мевлюдин Гьямзатовди хусуси йишв дибисна. Дугъу лап хатIалу гьядисайиъ инсандиз хас вуйи уьмрихьна заан тамарзувал нубатнан ражари субут гъапIну.
Мевлюдин 1988-пи йисан 20-пи октябриъ Исмяил ва Гюльнесир Гьямзатоварин аьхю хизандиъ бабкан гъахьну. Хизандиъ кьюр байна хьур риш айи. Дурарикан ихь игит хьурпир ву. Арха-бинайиинди Гьямзатовар Хив райондин Асккан Яракк гъул’ан ву. Хъа 1980-пи йисхъанмина дурарин хизан райондин Сюгют гъулаъ яшамиш шула.
Мектебдин кьяляхъ цIиб вахтналан Мевлюдин Дербент шагьриъ ерлешмиш дубхьнайи академик М. Д. Миллионщиковдин ччвурнахъ хъайи Грозненский гьюкуматдин нафтлинна техникайин университетдин филиалик урхуз кучIвру. Университетдин кьяляхъ 2010-пи йисан дугъу эскервалин буржи Красноярск шагьриъ айи военный частнаъ тамам гъапIну. Армияйиан гъафир Ставрополиъ тикилишчивалин жюрбежюр ляхнар апIури, хъа саб вахтна прорабдира лихури гъахьну.
Мевлюдиндикан хусуси метлеб айи дявдин операцияйиз гъягъюб чаз фици кьисмат гъабхьнуш, ктибтуб ккун гъапIнийза.
– Узуз таниш вуйи хайлин баяр спецоперацияйиъ айивали архаинвал туврадайзуз. Йигъ гъидипури, дурариз зенгар апIури гъахьунза. Гьар ражари гаф-чIал апIбалан кьяляхъ дурарин гьунарари узук хлинццар киври гъахьнийи. Гьамци йиз хушниинди ктабхъу йисан 15-пи декабри, Урусатдин яракьлу кьувватариъ гъуллугъ апIбан бадали, сад йисаз контракт гъийибтIунза. Аьгъязуз, улар пулиъ ахьну гъушур ву кIурударра цIиб даршлуб. Хъа дюзди кIуруси гъабхьиш, ляхин пулиъ адайи. Узу узуз ккуниси айир вуза, узхьан шлу кюмек баяр-шубаризра туври гъахьунза. Анжагъ жвуван дамарариъ абйирилан вуйи ватанпервервалин гьиссар жин апIуз шулдар. Хъа гьадди жвув рякъ’инра гъапIну.
Женгарин кIакIнаъ 35 касдин арайиъ ади гъахьунза. Учу кью-кьюр кас гьар хьуб суткайилан постниина гъаравулвал апIуз гьаъри гъахьунчу. Сабпи хьуб суткайиъ учуз саб хатIа-балара адарди ихь терефназди гъюрайи йицIбариинди вуйи дронар гъидисунча. Гьадмуган узура «Кьягьялвалин ордендиз» улупнийи.
Кьюб кIуру ражари 24-пи январи ич нубатнаъ гъаравулиз гъушиган, юкьуб кIуру суткайиъ дисурайи дронарикан узуз аьхю зиян гъабхьнийи. Зизкьихъан арччул ликрихъ мягьрум гъахьунзу. Сифте кюмекназ бакар шлу рубар-дармнар учухь хьайчухь. Дурар ишлетмиш апIбалан кьяляхъ ич аьхюриз мидкан мялумат тувнийча. Дурарин кюмекназ ккилилигди, учу айи жилин хулаз 4 километр манзил, кьякьби гъягъюрайи бицIи байси, гагь фуниинди, гагь маш заваризди дахъну, чвурхури-чвурхури гъафунза. Завлан гъюрубдихьан узу уьрхюри, йиз юлдаш Аликра гъафнийзухъди. Аьхюрихьан узухьна машин гьапIуз, ясана саб жарадиси фицибкIара кюмек апIуз шуладайи, фицики йигъну дициб ихтияр тувнадарчуз, анжагъ йишвнутIан. Хъа йишваз узу му ляхин илдипнийиш, йиз гьял фу шуйиш, сар АллагьдизтIан мялум дар.
Ликриз лазим вуйи вари кюмек дапIну, духтрари Белгород шагьриз гьаънийзу. Хъа магьа 30-пи январихъанмина Москвайиъ госпиталиъ аза. Умуд кивраза, дадайин, чвйир-чйирин, уьмрин юлдаш Интизарин, багахьлуйирин ва гъуландарин дюъйири, гьацира, шубур веледдин язухъшнаан Аллагьу Тялайи узу цIийикIултIан ликриин апIур пну. Кюмекназ бакар гъахьи дявдин женгарин дустариз, хъа гьамус гьадму кюмек давам апIурайи духтрариз чухсагъул мялум апIураза», – гъапнийи ихь кьягьяли.
