Аьхиримжи шубуб вазлин арайиъ Дагъустандин сагъламвалин Министерствойин дахилнаъ айи медицинайин цIийи вертолетдин кюмекниинди 60 касдиз, гьадму гьисабнаан 12 бицIирин сагъ’вализ, вахтниинди кюмек тувуз мумкинвал гъабхьну.

 

Улихьнаси санитарияйин авиацияйин ляхнин натижйириан федералин Минздравдин регионарихъди вуйи видеоселекторный совещаниейиъ РД-йин сагъламвал уьбхбан Министерствойин вакилари къайд гъапIганси, вертолет чарасуз ва тяди кюмек ккун апIурайи гьарсаб йишв’ина вахтниинди кюмекназ рубкьура ва вертолетдин пишекрари зарар-зиян гъабхьидариз медицинайин сабпи кюмек тувра. Медицинайин вертолетди аварйирин, тIуркIбарин, цIа кабхъуваларин, гизаф инсанар сабишв’инди зегьерлу хьувалин, ягъли йишвариан ахъувалин, хабарсузди ачмиш гъахьи гъагъи уьзрарин дюшюшариъ, фунуб йишв’инара вахтниинди хъуркьри, бицIи вахтнан арайиъ саб хатIасузвалра адарди медицинайин чарасуз кюмек лазим вуйи инсан больницайиз гъахуз мумкинвал тувра. Йишв’ина рукьайиз, вертолетдиъ лихурайи пишекрари завуъ амиди, вахтниинди реанимацияйин кюмек тувну, швнур-сар кас аьжаликканра ккадагъну.

Улубкьурайи йисан рес-публикайин медицинайин вертолет 150-тIан артухъ ражари ишлетмиш апIуз планламиш дапIна.

Къайд апIуз ккундучузки, санитарияйин авиацияйин артмиш’валин программайиинди медицинайин вертолет Кафари Кавказдин регионарикан сабпибди Дагъустандиз тувну. Думу программа, агьалйирихьна, хъа асас вуди дагълу ва ярхлаъ айи районариз тяди вуйи заан технологияйин медицинайин кюмек вахтниинди рубкьбан бадали, гьяракатнаъ ипнайиб ву.