23-пи феврали ихь халкьдин машгьур вакил, бажаранлу аьлим, тарихи илмарин доктор, гъайгъудар юкIв айи жямяаьтлугъ кас, Табасаран райондин гьюрматлу агьали Мягьямед Гьясановдин 85 йис шула.

Ихь аьлимди илмин цирклиъ гъазанмиш гъапIу ччвурар ва хъуркьувалар ктухуз хъюгъиш, гизаф йишв ва вахт лазим шулу. Хъа саб якьинди ва шаксузди тасдикь апIуз шулу – Хюрик гъулан агьали ва Табасарандин халис бай Мягьямед Гьясановди жвуван халкь ва бицIи Ватан бадали кьимат тувну ккудубкIуз даршлу зегьмет гъизигну. Дугъан илмин ляхнари, монографйири табасаран халкь къадим тарих айиб, табасаранар жвуван азадвал ва милли аьнтIикьавал бадали аьсрариинди жюрэтлуди чапхунчйирихъди дявйириъ гъахьи ва ифдикди насларихьна игитвал ва намуслувал туву халкь вуйиб тасдикь апIура, ихь миллетдин ад лайикьлуди за апIура.

Гьюрматлу Мягьямед Ражабович! Редакцияйин ва газат урхурайидарин терефнаан уву марцци кIваан юбилейихъди тебрик апIурача. Гъит яв гъюзимбу уьмрин юлчйир ишри мюгькам сагъвал, кIван шадвал, хизандиъ саламатвал ва илимдихьна вуйи дурумлу гьевес.