Мейлан Нежефов
Зиихъ дупнайиб гьисабназ гъадабгъну, «Шаирин хатI йиз уьмриъ» кIуру темайихьна чпин лигуб фициб вуш ахтармиш апIури, узу Хив райондин мектебариъ урхурайи баяр-шубарихьна илтIикIнийза. Дурарин ужударстар фикрар газатдин машариъ жикъиди туврача.
Межидова Амина, Лик’а-рин мектебдин 9-пи классдиъ урхурайи риш: «Узу литературайиин ва чIалниин лихурайи аьяндар инсанарихьна гьарган гьюрмат ади шулза. Дугъриданна, дурарин ччвурар ич арайиъ ва дарсариъ ерхьруган, гьарган хизандин багъридарикан улхруси гьибгърузуз. Уччвуйи фикир гъапIу вахтна, гьаци хьузра даринхъа!? Гьадрарин бикIбариан, ктитбариан ву жигьил насил жвуван халкьдин гъубшубдин дерин мянайин гъавриъ хьувал. Эгер лазим вуйи саягъ дурари гьадму гьиссар ухьухьна рукьурадайиш, йиз фикриан, ухьу ккудубшубдин гъадри ва гъавриъ шулдайи».
Милана Гьябибова, Хирижв гъулан кьялан мектебдиъ 10-пи классдиъ урхурайир: «Дарсарихьан азад вахт ккабхъубси, урус ва ихь чIалариинди вуйи литература урхури шулза. Урхурайи эсерариъ гьарган фу-вуш цIийиб бихъури шулзуз. Гьаци, урус ва багъри литературайин шаирарин бикIбари йиз уьмриъ табиаьтдихьна ва ккунивалихьна вуйи хиялари кюкю адабшвуз гъитра. Иллагьки гьамусдин деврин литературайин шаирарин бикIбари».
Мевлюд Велибегов, Мажвгларин кьялан мектебдин 10-пи классдиъ урхурайир: «Шаир хьуб думукьан рягьят ляхин дар. Думу инсандихьна саб фициб вуш табиаьтдихьан дуфнайи ялав ву. Узуз 5-пи классдихъанмина Кьалухъ Мирзайин эсерар кьабулди вузуз. Дугъан эсерариъ, гьамусдин шаираринси дарди, душмнин улариз лигури, гучI’вал дипну, жаваб тувру хатI а. Думу саризра табигъ вуди гъахьундар. Аьдати инсанарихьна вуйи дюзвал абгури, думу ханар-бегларизра кмиди къаршуди удучIвуйи. Шаирин гьамциб кьягьялвалин бикIбан хатIнаан гьарсаб эсер урхруган, жандиз хар утIубччвурайиз ва Ватандихъан юкIв убгувал хъана артухъ шулайиз.
Амина Рамазанова, ГъуштIларин кьялан мектебдин 11-пи классдин выпускница: «Литературайи йиз уьмриъ чан хусуси йишв бисура. Думу гьаци вуйиб гьаму йигъари гъабхьи олимпиадайиъ лайикьлу 1-пи йишв узуз кьисмат гъабхьивали субутра апIура. Интернетдиан дарди, чIиви китаб урхуб ккуниб вуйиз. Китабдин кIажарихъан шаири гьисс апIури гъибикIубдин тIяаьм гъюразуз. Гьарсаб гъурху эсерин лазим вуйи мялуматар ва анализ гъабхурайи дафтар гьарган йиз хиликк кка. Думу йиз уьмрин шадвалинра, пашманвалинра гъадри айи ва узуз кьувват туврайи гьякал вуйиз».
