Гюльнара Мягьямедова

2024-пи йисан январин вазлин кIулариан гъадабгъну гьисаб апIуруш, Урусатдин Федерацияйин Яракьлу кьувватарин жергйириз контрактдиинди эскервалин гъуллугъ гъабхуз 100 агъзурилан зиина ватандашар гъафну. Дидин гьякьнаан Урусатдин оборонайин министерствойин телеграм-каналиъ мялумат тувра.

 

«Москвайиъ ва Урусатдин жара шагьрариъ РФ-дин Яракьлу кьувватарин жергйириз контрактдиинди дявдин гъуллугъназ гъюз ккунидарин кьадар артухъ дубхьна.
Аьхиримжи гьяфтана гьацIан арайиъ Урусатди гъабхурайи хусуси метлеб айи дявдин операцияйиъ иштирак хьпан бадали, дявдин гъуллугъназ контрактдиин къул зигурайидарин кьадар аьхюб ву.
Вари ихь уьлкейиъ дявдин гъуллугъназ кьабул апIру, контрактдиин къул зигру пунктариз гьар йигъан 1700 кас гъюра. Аьхиримжи 10 йигъандин арайиъ хусуси метлеб айи дявдин операцияйиъ иштирак хьуз разивал ади, 16 агъзур ватандашди контрактдиин къулар дизигна», – дупна мялуматнаъ.

Урусатдин шагьрариъ айи, контрактдиинди гъуллугъ апIуз ккунидар гъядягъру пунктариъ гъуху сюгьбатариан мялум шулайиси, аьхюну пай кандидатар 2024-пи йисан 22-пи мартди Подмосковьейиъ гъабхьи терактдиъ гъийихдарихъан кьисас алдабгъуз ккунди хусуси метлеб айи дявдин операцияйиз гъягъюрайидар ву.

Улихьнаси Урусатдин оборонайин министр, армияйин генерал Сергей Шойгуйи туву мялуматариинди, 2024-пи йисан аьхириз Урусатдин Яракьлу кьувватари уьмуми кьушмарикан ибарат вуйи кьюб армия ва 30 соединение, гьадму гьисабнаъди 14 дивизия ва 16 бригада арайиз хувал планламиш дапIна.