Шамил Къазиевди цIийи шиир арайиз гъафиган, думу дишлади чан гъарашугъариз, дидин гъаври шлу касариз улупуз ккунир, дидихъди таниш апIуз ккунир вуйи. Аьхиримжи йисари цIийи шиир дугъу телефондихъан урхури гъахьну. Яна инсанарихъди шадвал пай апIуз ккуни кас вуди гъахьну.
Шаири дявдин темайиан дибикIнайи «Руг ва рюкъ» поэма СтIал Сулеймандин ччвурнахъ вуйи республикайин премияйиинди, хъа дугъу табасаран чIалназ таржума гъапIу Петр Ершовдин «Гъузгъун дайча» махъв Петр Ершовдин ччвурнахъ вуйи Вариурусатдин литературайин премияйиинди лишанлу гъапIну.
Шамил Къазиев табасаран шаирарикан сарпирди М.Горькийин ччвурнахъ хъайи Литературайин институтдик урхуз кучIвну.
Шаири табасаран халкьдин фольклор тартиб дапIну 10-тIан зина литературный махъвар гъидикIну – «Хъинцамегьмер», «Гъюран жилгъа», «ЦIамцIамрин швушв», «Гатдин гиран», «Гьарган инкар Абукар», «Зейнаб бабан Зангар», «Гьяснан тахсир», «Уьъйир апIру сул», «Гъюрна кьюл», «Аьбдул-Барина кIари», «КурцIил Исрафил» ва гь.ж. Халкьдин махъварихьна вуйи аьшкь шаирин гъянаъ чан адаш Рамазан Къазиевди кабхьну.
Учв Мягьячгъалайиъ яшамиш шулашра, Ш.Къазиевдин юкIв гьарган Табасарандиъ ади гъабхьну. Райондиз дуфну, дустарихъди, ярашугъарихъди нирихъ деу вахтна, дугълан, «Гьай бахтаврар, Рубас нирихъ яшамиш шулайидар», кIури, ухьт алдабхьуйи.
Ш. Къазиев харатчивалин бажаранвал кайир вуйи. Дугъу чан хилариинди ктапIу, телефон дивру ярхи ликар ккайи стол гъира дугъан хулаъ ими.
Шаир гизаф зарафатар ккунир, зарафатар апIрур вуйи, амма варидарин арайиъ дугъу зарафатар апIурдайи, анжагъ чаз ккуни, багахь вуйи инсанарин арайиътIан. Шад шлуган, сяргьятсуз шадвал хъапIуз аьгъюр вуди гъахьну
Ш. Къазиев хайлин йисари Дагъустандин китабарин чапханайиъ табасаран отделин редакторди гъилихну. Дугъу бажаругъсуз касарин китабар дюн’яйиз удудучIвбан бадали хайлин чарйир зигури гъахьну, хъа эгер дурар адраъри гъитуз шуладарш, думу китабарихьна кучIвбан (сифте) гаф затра бикIури гъахьундар.
Ш.Казиев инсандиз уж’вал апIуз ккунир, аьжайиб саягънан ва хабарсуз пешкешар апIуз ккунир вуди гъахьну. Дугъу жигьил шаирарин эсерар, дурариз хабар тутрувди, уртахъ гъварчарик каъри гъахьну. Чан сар ярашугъдиз Ш.Къазиевди чаз Мягьячгъалайин сабуну паркдиъ гъибихъу аьжайиб кIалибнан бакIлукI багъиш гъапIну.
Ш.Къазиев гьяйванатар гизаф ккунир, табиаьтдин айтIан уьмур рябкърур, мизмизар, ппеппйир, гьяшаратарра кмиди инсанарси аннамиш апIрур вуди гъахьну. Гьаддиз дугъан махъвариъ дурари аьхю йишв дибисна.
Шаириз «Мяшка» кIуру гату ади гъабхьну. Думу Къазиевдиз кьадарсуз ккундийи. Саб ражари дидиз зиян гъабхьиган, шаири гизаф дерд зигури гъахьну, дугъу гатдиз, инсандизси, хъайивал апIури гъахьну. Авторин дидиз бахш дапIнайи шиира а.
