Наргиз Гюлечова
Дагъустан Республикайиъ 2023-2024-пи йисарин хулариз манишин тувру фаслин вахтна яшамиш шлу хуларин месэлйириз лигру гьюкуматдин инспекцияйиз (ГЖИ) манишнахъди аьлакьалу вуйи аьрзйир хьади 3404 агьали илтIикIну. Гьаму кьадарнакан 644 аьрза хулариз туврайи манишнан ери ужуб дарувалин, 489 штун, 286 акварин ва 148 газран гьякьнаан вуйи. Гьамцдар мялуматар журналистариз улихьна йигъари гъабхьи пресс-конференцияйиъ ГЖИ-йин кIулиъ айи Сергей Касьяновди тувну.
– Гьарсаб аьрзайин гьякьнаан ахтармиш апIбанна гюзчиваликк гъитбан серенжемар гъухунча. Пуз ккундузузки, 2023-2024-пи йисари республикайиъ хулариз манишин тувру фаслин вахтна, гизаф мертебйирин хулар айи муниципалитетариъ 731 ахтармиш’валин серенжемар гъахьну. Натижайиъ тахсрар ктучIву касариин 6 миллион манаттIан артухъ журум илибтIну. Агьалйирин комунальный гъуллугъар бегьемди тамам дарапIрувализ лигну, журум илибтIайиз улихь ккимиди 11 миллион манатдин гьякьнаан цIийи саягъниинди гьякь-гьисаб апIбан бадали, 17 аьрза «Россети Северный Кавказ» – «Дагэнерго» ПАО-йиз, «Газпром межрегионгаз Махачкала» ООО-йиз, «Дагестанэнерго» ООО-йиз ва «КаспийТеплоСервис» ООО-йиз хъадаъна, – гъапнийи Сергей Касьяновди.
Дугъан гафариинди, манишин тувру фаслин вахтна варитIан гизаф аьрзйир Мягьячгъала шагьрин агьалйирихьан (1918 аьрза), хъасин Каспийск (476 аьрза), Дербент (104 аьрза) ва Хасавюрт (94 аьрза) шагьрарин агьалйирихьан гъафидар ву.
«2023-2024-пи йисарин хулариз манишин тувру фаслин вахтна, асас вуди алахьури гъахьи читинвалар пландиинди вуди вая пландиинди дарди кми-кмиди аквар ктIушвурайивалиан вуйи, фицики гъи гизаф мертебйирин хулариъ айи манишин хусусиб, янаки жвуван хулан айтIан жвуву туврайиб ву. Гьаддиз, аквар ктIушвиган, манишин туврайи котел электроэнергияйихъди либхурайиб вуйивализ лигну, акварихъди сабси манишинра ктIубшвура», – гъапнийи С.Касьяновди.
Республикайин жилинспекцияйин кIулиъ айирин гафариинди, 2024-пи йисан эвелиан апрелин вазлизкьан ГЖИ-йин пишекрари, республикайин муниципалитетариъ сарихьанра ихтияр адарди, чпин кIул’инди газ хулариз дизигну, пичарихъ хъибтIнаш лигури, 33 агъзур квартирйир ахтармиш гъапIну. Натижайиъ 4300 гьюкуматдин сертификация адру пичар ашкар гъахьну.
Мидланра гъайри, манишин тувру алатар къайдасузди, пландиинди дарди диврайивалира саб кьадар читинвалар хура. Мисалназ, гизаф мертебйирин хулариъ яшамиш шулайири пландиинди дарди чан квартирайиз манишин гъизигиш, дугъан гъуншдин квартирайиъ затра мани дархьуз мумкин ву.
«Гьаму йисан эвелиан кIули гъуху ахтармиш’валари улупурайиганси, республикайиъ пландиинди дарди, къайдасузди манишнан гъурулуш дизигнайивалин 50-тIан артухъ дюшюшар ашкар гъахьну», – гъапнийи Сергей Касьяновди.
Журналистарин суалариз жавабар туври, РД-йин яшамиш шлу хуларин кIулин инспектори гъапиганси, гъийин йигъан гизаф мертебйирин хулариъ къайда дебккбан бадали, гьюкуматдин терефнаан вуйи гюзчивал ижми дапIну ккунду, дарш йигълан-йигъаз аварийный гьялназ гъюрайи хуларин кьадар ва идара апIурайи компанйириина вуйи аьрзйир артухъ хьиди.
