ЦIийи 2020-пи йисаз бахш вуди Мягьячгъалайин ачухъ майднариъ кIули гъушу шадлугънан серенжемариъ 150 агъзуртIан артухъ шагьрин агьалйири ва мина дуфнайи хялари иштирак’вал гъапIну.

 

Машкврин серенжемар декабрин 25-пи йигъан М.Горькийин ччвурнахъ хъайи Урус драмайин театрин дараматдин улихь ккергънийи. Думу йигъан «Магайин ва Патяйин ЦIийи йисандин дюшюшар» ччвур тувнайи Дагъустандин сабпи мюзикл ва «Мягьячгъала, ЦIийи йис мубарак ибшри!» концерт кIули гъушнийи. Сягьнайиин республикайин художествойин культурайин коллективари ва ансамблари, Дагъустандин эстрадайин артистари мяълийир ва ялхъвнар гъапIнийи. ЦIийи йисан хушбахтлу уьмур ккун апIури, уч духьнайидарихьна Мягьячгъалайин мэр Салман Дадаев илтIикIнийи.

Машкврин серенжемар шагьрин жара паркариъра кIули гъушну.

Мягьячгъалайин агьалйир ва шагьриз дуфнайи хялар варитIан мюгьтал гъапIдар Аяз аба ва Йифун риш вуйи. Дурар махъварик кайи жюрейин уткан фургъундиъди, ЦIийи йисахъди мубарак апIури, Мягьячгъалайин вари аьхю кючйириъ гъилицну.

2020-пи йис кьабул апIури Дагъустандиъ, кIули гъуху серенжемарикан варитIан важиблуб 28-пи декабриъ, рас апIбан асас ляхнар ккудукIбан кьяляхъ, Лениндин ччвурнахъ хъайи майдан ачмиш апIувал вуйи. Думу майдан ЦIийи йисандин асас серенжемар кIули гъушу йишв гъабхьну. 30 метр ягълишин айи ёлкайин багахьна уч духьнайидарин улихь Дагъустандин Глава Владимир Васильев удучIвну гъулхнийи ва вари дагъустанлуйир улубкьурайи 2020-пи йисахъди тебрик гъапIнийи.

31-пи декабриъ гьацIишвар улубкьиган, завариз машкврин салют деебтнийи. Майдандиин завуъ миллиондиинакьан рангнан аквар ургуз хъюгънийи. Машкврин салют 10 дакьикьайиъ давам гъабхьнийи.

ЦIийи йис улубкьбан кьяляхъра машквар къайд апIбан серенжемар давам гъахьну. Гьар йигъан шагьрин кьялан майдандиина ва жямяаьтлугъ йишварихьна агъзрариинди инсанар рягьятвал гъадабгъуз гъягъюри гъахьну. Шагьрин майднариин бицIидариз машгъулвалин тамшир апIру йи-швар ачмиш дапIнайи.