Ички убхъбиин гьевескар кас айи хизан бахтсуз хизан ву. Гьаммишан гъалмагъал ади, касибвал кади, буржари кагъну айи думу хизанариъ айи дишагьлийир, кьюб рякъюн кьялаъ ахъну, наанди лик дивруш аьгъдарди, пашманвалиан русвагьди шулу.
Думу рякъяр варидариз мялум ву: саб – абайин хал, хъа тмунуб – жвуван веледарихъди пияниска жилирин алчагъ’валар аьгь апIувал. Дишагьлийиз кьюб рякъ аш, веледариз дициб мумкинвал адар. Пияниска адаш айи хизандин веледариз лапра гизаф читинвалар алахьуру. Аьхюнуб пай веледари чпин адашди гьаммишан дубхънайивалиан жвуван тай баяр-шубарин улихь бицIивахтнаан мина нач’вал гьисс апIуру.
Исихъ чап апIурайи ихтилат сар Хиван вуйи касди узуз ктибтуб ву. Белки, дугъан сюгьбатну ичкийиин аьшкьлу вуйи сар шлиз-вуш тясир апIур ва думу аьдати уьмрихъна хътакур кIури, миж кивуз ккундузуз.
«Узу лап бицIиди вуйиган, кIваинди имизуз, адаш пиянди айиган, гьадмукьан рази шуйза. Дугъу йиз вари хиялар тамам апIуз разивал тувуйи. Узуз ккуниб масу гъадабгъуз гаф тувуйи. Чан жибдиан кепкар адагъну, гъяфтар масу гъадагъуз тукандиз гьауйи. Узу гьар алахъу йиз дустраз, адашдин тярифар апIури, дугъаз узу ккуниваликан кIури, узухь хьайи пулиинди фурс апIури, тукандиз жаргъуйза. Думу вахтна пиянди айи адаш узуз шадурси, гъянирси гьиргъуйзуз. Гьамкьан ужур адашдихъди дада гьаз улхурайкIан кIури, фикир апIуйза. Хъа яшар артухъ хьпахъ узу ич хизандин аьгьвалат ужуб дарувалин гъавриъ хьуз хъюгънийза.
Гъюблан-гъюбаз адашди кми-кмиди ва артухъ убхъуз хъюгънийи. Пиян гъахьиган, думу гьаммишан яман хъял кади хулаз гъюйи. Тахсир ктру дадайиз йивру вахтна, узукра гизаф ражари дугъан гъагъи гъурдар ва кьусмар куркIнийзук. Адашди дадайиз йивурайган, узу дадайин улихь гьучIври, думу йиз бицIи жандихьди ккеркри, адашдин ликарикк ккархьри, дугъу дадайиз диривбан миннат апIури гъахьнийза. Варидарин фикриъ пияниска жилижви, усли жандин, бедендиъ бегьем кьувват адру, уьзрари ккагънайи кас ву кIури, хиялар ашул. Пиянискйирин арайиъ гьацдарра а. Хъа ич адаш дицир дайи. Пиянди ашра, дугъаз рягьятди кьюр жилижви ккагъуз шлубсиб кьувват айи. Амма дадайикна узуктIан гъайри, думу жарадарихъди кчIихудайи. Жарадарихъди думу дуст, ужур юлдаш, буржназ вушра чан терефнаан «дустариз стол балгру» кас вуйи.
Йиз 12 йис гъабхьиган, адаш убхърубдихьан сацIиб ярхла хьуз хъюгъну. Дугъу гьяфтайик сабан-кьюбантIан убхъудайи, амма хулаз гъафири, гъалмагълар ккергъбалан гъайри, шюшдин гъабар, хулан алатар, йиз уюнжагъар уьргъюз, дадайин палтар чIяргъюз хъюгъюйи. Саб ражари дугъу йиз компьютерра гъюбгънийи.
Мектебдиъ ва дустарин арайиъ узу адашдикан затра улхури шулдайза. Адашдихьна вуйи мани гьиссар йиз бицIивахтнаъ гъузну. Дугъ’инди дамагъ апIуз шулдайзухьан. Аьксина, кючейиъ дустарихъди хъайи вахтна, пиянди гъвал-гъвалахъди гъюрайи адаш рякъруган, нач шуйзуз. Ярхлаан думу гъяркъиган кялхърайи дустар, багахьна гъурукьган йиз адаш вуйиб аьгъю гъахьибси, узуз начди айивалин гъавриъ шули, жарабдикан улхуз хъюгъюйи. Узу, дурарихьнаси, адашдихьнара гъянаъ хъял уьбхюри гъахьнийза. Швнуб-саб йишвахь, «узуз адаш ккундарзуз», кIуру гафарра тадахьунзухьан. Увуз нач дарнуз!? Увухъ гъизигу зегьмет аьгъю гъабхьундарвуз. Фицир-вушра адаш ади ккунийкIана кIури, яшамиш шулайи йитимар а, кIурударра гъахьнийи. Гьаму жюрейин гафар кIурудариз йиз саб жаваб вуйиз – учву йиз бицIивахтнан уьмур хъапIай, адашдин ифди хюч апIурайи бацаригъян дада гъючIюгъяй, хъасин насягьят тувай!
СацIиб аьхю гъахьиган, узу йиз аьхюнуб пай вахт бабан хулаъ гьапIри гъахьнийза. Адашдихьна вуйи йиз гьиссар гучI’валихъди ва нач’валихъди аьлакьалу вуйи. ГучI’вал яш 14 йис гъабхьихъан тина яваш-явашди гъудубгну, хъа нач’вал гьамусра гьисс апIури амиза. Узу ички дурубхъру адаш айи юлдшариз бахтаврар кIуйза. Дурар гьаммишан узутIан ужуди палат алабхьну, гьар йисан цIийи ликариин алахьрудар алди, хилиъ телефон ади шуйи. Бахил дархьиди фици гъузру? Хъа ич хизандиъ йикк кайи хураг анжагъ гирами хялар гъюруган вая машквраризтIан апIури шулдайи. Кьаби духьнашра, адашди гъира ички убхъури ами. Узуз адашди дурубхъри, учу бахтлу хизан вуди ккундийзуз. Хъа, гьяйиф…
Гъи узу кьюр веледдин гага вуза. Йиз веледари узхъан наумуна, тербия, аьгъювалар гъадагъну, дурариз узу уьмрин дамагъси улупуз, дурариз узу уьмрин даягъ хьуз ккундузуз. Гьаму гьиссар узуз йиз уьмриъ гьуркIри гъахьундарзуз. Йиз веледариз дициб дарс тувударза»…
