Умгьанат Сулейманова
Гъубшу гьяфтайиъ Гъалибвалин йигъан Дагъ. Огни шагьрин администрацияйин улихь хьайи паркдиъ, хусуси метлеб айи дявдин операция-йиъ кечмиш гъахьи эскрарин гьюрматназ КIваин уьрхбан багъ ибтну. Думу багъдиъ 31 кьягьялин ччвурнахъ гьарар кивну.
Серенжем Дагъ. Огни шагьрин главайин вазифйир вахтназ вуди кIули гъахурайи Аллагьверди Халиловди абццнийи. Мяракайиъ РД-йин Халкьдин Собраниейин депутат Сефер Аьлиев, гъийиху эскрарин багахьлуйир, хусуси метлеб айи дявдин операцияйин иштиракчйир, шагьрин депутатарин собраниейин ва жямяаьтлугъ тешкилатарин вакилар, мектебариъ урхурайи баяр-шубар ва мялимар иштирак гъахьнийи.
Серенжем гизаф маракьлуди гьязур дапIнайи. Амма абйир-бабарин уларилан гъягъюрайи нивгъарихьан дурариз вари рябкъюри гъабхьундаршул. Серенжемдиз дуфнайидари Ватан ва ислягьвал бадали гъийиху эскрарин заан намуснакан, игитваликан хайлин ктибтнийи ва дурарин багахьлуйириз мицисддар кьягьялар дюрхну вердиш апIбаз афериндин мани гафар гъапнийи.
«Гъи му КIваин уьрхбан багъ ибтбан метлеб гъийиху эскрар ухьу гьарган кIваинди гъитуб ву. Игит баяр аьхю гъапIу гьюрматлу дадйир, учу учвухъди аьхир йигъазкьан ичв учIвру дерд сабси пай апIуз гьязур вуча, – гъапнийи чан улхбаъ Аллагьверди Халиловди. – Му багъди ихь баяр гьаммишандиз инсанарин юкIвариъ уьрхюз гъитди. Мушвкан гьарсар дерд кайи абайиз ва бабаз чпин сир ачухъ ва юкIв сикин апIуру йишв хьибди».
«Абайин юрд уьбхрюдар» гьюкуматдин фонднан жямяаьтлугъдихъди вуйи аьлакьйирин ляхин гъабхурайи Аьйшат Султаниевайи, гъийиху игитарин дадйирихьна илтIикIну, дурарин дерд-хажалатнакан чаз имбударизтIан ужуди хабар айиваликан гъапнийи. «Хусуси метлеб айи дявдин операцияйиъ гъийиху эскрарикан вуйи хабрар, дурарикан вуйи вари мялуматар узухьна, ич фондназ хътауру, шлиз аферинвалин кагъаз, шлиз орден-медаль тувнуш – саки вари мялумат узхьантина гъябгъюрайиб ву.
Аьхю чухсагъул кIураза учвуз, жанди айи дерд жин дапIну, гъи му серенжемдиъ иштирак шулайивализ. Му йишв сарун ухьуз варидариз 31 кьягьялин ччвурнахъ вуйи гьарар кивнайи гирами эскрарин багъ гъабхьну. Гъит му багъдин гьарар ухьхьан гъушу ихь жигьиларин гьунарарикан шагьидвал апIури ва ихь юкIвариз сабур туври гъузри».
Му серенжемдиз дуфнайи абйир-бабари, чпин баярин игитваларикан ктибтури, дурарин ччвурар али гьарар кивуз хъюгъну. Ва узура, багахь духьну, дурарихъди гаф-чIал гъапIунза.
Гьясанбегова Муминат: «Украи-найиъ хусуси метлеб айи операция ккебгъну кIури хабар кубкIубси, валлагь, йиз Артур дявдиз гъахуру, гъапунза. Гьаци гъабхьнура ву. Узуз айидар 2 ришна 2 бай вуйиз. Жилир ухди гъакIниз. Артурихьан зенг адарди юкьуд-хьуд йигъ гъабхьнийи. Ва нивкI гъябкънийиз: Артур айи госпиталь ву кIури шулу, амма мушв’ин я унчIвар, я раккнар алдайи. АйитIна учIвурза – фужкIара ади шулдар. Гьамцдар ичIи нивкIар хъана рякъюри гъахьниз. Ва сад-кьюд йигълан аьхюну бай Арсенди узуз зенг дапIну, Артурик гюллйир куркIну, думу госпиталиъ а кIури, хабар гъапIниз, дада, гъапнийи. Хъа йиз Ренат, вуйиштIан, узуз нивкI рябкъру вахтна дукIнади гъахьну… Дугъан майит душман айи терефнаъ ади, ихь терефназди адабгъуз даршули, швнуд-сад йигъ гъабхьнийи.
Артури узуз аьхиримжи зенг чав йикIайиз, 21-пи апрели гъапIну. Узу алдатмиш апIрубси, Украинайин сяргьятарихъ хъаза, дада, гъапну. Узу чаз «Жан бай, ихтият апIин», гъапи вахтна, «Лиг дада, узкан гиран мапIан, узу душмнин йисирвалиъ ахъайиз дукIну ккундузуз», жаваб тувнийи. 2022-пи йисан 22-пи апрели, чан багахьна душмнар гъюрайи вахтна, йиз бали хилиъ айи гранат гъутIубкIну.
Мирзакеримова Сейранат чан кьюрид баярра, багахьлуйирра хъади серенжемдиз дуфнайи. Сейранатдин жилир, Абрик Мирзакеримов, 2022-пи йисан 25-пи сентябри Херсондиъ игитси кечмиш гъахьну.
Гъи Дагъ. Огни шагьриъ ерлемиш дубхьнайи 7-пи мектебдиз Абрик Мирзакеримовдин ччвур тувна.
Абрикдин ва Сейранатдин кьюр бай а – Камили 11-пи классдиъ урхура, бицIину бай Каримдин гьеле 6 йистIан дар. БицIи Карим, адашдин ччвур али гьар кивуз ичIиди гъафундар – думу йигъан бали чан адашдиз бахш дапIнайи шиира гъурхнийи.
Азейрбайжан дишагьли Нурова Кефияйи чан ихтилат гьамци башламиш гъапIнийи: «Хусуси метлеб айи операция ккебгъруган, йиз Ренатдин, контракт йибтIну, йисна миржиб ваз вуйи. Дугъан военный ляхнихъ гизаф юкIв хъайи.
Хайлин вахтна аьлакьайиз удудучIврайи Ренатди 31-пи мартди узуз хабарсузди видеойин зенг гъапIнийи. «Дада, уву йиз фикир мапIан, 9-пи Майдиз, гъалиб духьну, гъидича», – гъапнийи.
Хъа 2022-пи йисан 1-пи апрели сар урус бай, СиртIич гъулан агьали Марат ва йиз Ренат айи машин минайиин гъутIубкIну… Дагъ. Огни шагьриз дукIну гъахидарикан сарпир йиз Ренат вуйи… Аьхюнур велед вуйиз, дугъаз швушвра ча дупнайза… Магьа 2-пи ражари 9 Май гъабхьну, хъа Ренатдиз гьамусра улар ккилигурайиз», – ишуб тадабхънийи Кеф’яйиан. – «Ичв газатдиз дугъкан гъибикIиш, йиз Ренат рази хьиди. Дугъаз табасаран чIал ккуниб вуйи. Гьаммишан ич кючейиъ айи яшлуйирихъди табасаран чIалниинди гафар, зарафтар апIуйи. Дугъриданра, дугъан рюгьназ му ляхникан аьян дубхьну, рази хьиди йиз бай».
