Зубайдат Шябанова
Майдин 15-16-пи йигъари Грецияйиъ яшар 15 йис хьайиз вуйи живанарин арайиъ спортдин юкьяр дисбаан Европайин чемпионат кIули гъубшнийи. Урусатдин сборный командайин дахилнаъ Табасаран райондин кьюр вакилра айи – Мягьямед Гьямидов ва Шамиль Абакаров. Кьюрид живанарира гъизилин медалар гъазанмиш гъапIну. Газат урхурайидариз ихь чемпионарикан ктибтуз ккундучуз. Гъийин макьала Мягьямед Гьямидовдикан хьибди.
Мягьямед Гьямидовдин абйир Табасаран райондин Гюгьрягъ гъул’ан ву. Адаш Эмиржан, гьадму саб вахтна сифте Ивановский областдин Кинешма шагьриз, хъа гьадушв’ан Дербент шагьриз кюч гъахьнийи. БицIи вахтнахъанмина спортдиин машгъул вуйи Эмиржанди чан аьхюну бай Мягьямедра спортдиин аьшкьлу гъапIну. Ич сюгьбатнаъ Мягьямедди сабпи нубатнаъди гъалибваларикан ктидибтди, чан тухмин вакиларикан дамагълуди тярифар апIуз хъюгъю.
«Йиз адашра, абара, имира спортдиин машгъул ву. Узу дурариинди дамагъ апIураза. Адаш бицIидихъанмина Дагъни гъулан мектебдин спортзализ гъягъюри гъахьну. Мектебдиъ урхури имиди, адаш юкьяр дисбаан райондин чемпион гъахьнийи. Хъа Волгоград шагьрин Гьюкуматдин физический культурайин ва спортдин академияйиъ урхурайи йисари, швнуб-сабан Волгоград шагьрин ва Волгоград областдин чемпион гъахьну. 2002-2005-пи йисари адаш Москва шагьриъ машгьур тренер Анатолий Маргиевдин хиликк, ЦСКА клубдин командайин дахилнаъди, Урусатдин чемпионатарин гъалибчи гъахьну, гьадму гьисабнаан 2004-пи йисан Олимпийский тамшириз гъядягъру Урусатдин талитариъра. Хъа аба кIуруш, Халагъ гъулан мектеб ккудубкIган, Кафари Осетияйин гьюкуматдин университетдик урхуз кучIвнийи. Гьадушваъ физикайинна математикайин факультетдиъ урхури, думу Владикавказ шагьриъ «Динамо» спортдин клубдиъ гьязур шули гъахьну. Дугъу Кафари Осетия республикайин хайлин чемпионатариъ пешкешнан йишвар гъадагъну. Университетдин кьяляхъ абайи Дагъни гъулан мектебдиъ дарсар киври, гьадушваъ юкьяр дисру спортдин жюрейиан секцияра ачмиш дапIну, живанариз аьгъювалар туври гъахьну. Абара, адашра Урусатдин юкьяр дисбан спортдин мастерар ву. Узузра дурарин шилнаъди гъягъюз ккундузуз», – дамагъ кади ктибтура абайин ччвур али Мягьямедди.
Мягьямед Гьямидовди цци 9-пи класс ккудубкIну. 11-пи класс ккудубкIхъан дугъан спортдин цирклиан институтдик кучIвуз планарик ка. Хъа абйирин шилнакан улхуруш, думу гъи кабкIнайи мюгькам рякъ дубхьна. Гьаци вуйивал Мягьямедди жюрбежюр чемпионатариъ гъазанмиш гъапIу 87 медали, 40 кубокди ва 6 чIули субут апIура. Жигьил спортсмендин, чан яшариз гъилигиган, му зурба хъуркьувал ву. Хъа гьаддихъди сабси, спортдиъ Мягьямеддиз гъи дерд шлу дюшюшарра алахьура.
«Урусатдин сборный командайин дахилнаъди Грецияйиз 13 спортсмен гъушнийча. Душваъ 7 гъизилин ва 3 арсран медалар гъадагъунча. Пуз ккундузузки, талитариъ Урусатдин спортсменарихьна судйирин терефнаан гизаф илзигувал айи, ва дурари учуз дюз дарди баллар диври гъахьнийи. Мисалназ, йиз кчIихбарикан сабдиъ узуз тувну ккуни 6 балл узухъди талитнаъ айириз тувнийи. Думура баладар, сабпи йишвар гъадагъу жара гьюкуматарин спортсменар пьедесталиина удучIвган, дурарин гимн йивури, хъа ихьдариз дириври гъахьну. ИкибаштIан, му дюшюшари ихь вари баяриз чIуру тясир гъапIну.
Хъа талитарикан улхуруш, узу душваъ 5 ражари кчIихбариз удучIвунза. Сабпи кчIихуб Грецияйин, кьюбпиб Румынияйин, шубубпиб Арменияйин, юкьубпибра Грузияйин ва финалиъ Турцияйин спортсменарихъди гъабхьнийиз. Му хьуб кчIихбакан варитIан гъагъиб финализ удучIвру талит гъабхьунзуз. Жара уьлкйирин спортсменарра вари бегьемди гьязур духьнайи. Гьаму жюрейин аьхю талитариз узу Москва шагьрин командайин дахилнаъди уьлкейиъ гъалибвалар гъазанмиш апIбан кьяляхъ гьаунзу. Саб ражари Москвайин спортдин «Трудовые резервы» клубдин тренер Рустам Муртузялиевдиз талитариъ йиз кчIихбар гъяркъну, ва дугъу адашдикан узу чпин клубдиз гьауб ккун гъапIнийи», –
ктибтура Мягьямедди чав фици москвайин командайиз адахънуш.
Мягьямед Дагъустандин, СКФО-йин ва Урусатдин швнуб-саб ражари чемпион духьна. ИкибаштIан, дугъан абйир-бабар веледдин хъуркьувалариин разиди ву.
«Мягьямед гьадмукьан ужур, рягьимлур, варидариз кюмекназ гъюз ккунир, спортдиин, чпин адашси, кьадарсуз юкIв алир ву. Мектебдин дарсарихьнара гьаммишан гьязурди шулу. Чемпионатариъ гъалибвал гъадабгъубси, дугъу, сабпи нубатнаъди, адашдиз зенг апIуру. Хъа адашдихъди вуйи гафар ккудукIбан кьяляхъ, узуз зенг дапIну, чаз варитIан ккуни хураг – тIубан хинкIар гьязур апIуз шулуш, гьерхру. Дюзди гъапиш, учу гъалибвализ ккилигури шулдарча. Уьмриъ варитIан важиблуб сагъвал ву, хъа сагъвал аш, гъалибваларра хьиди»,
– гъапнийи Мягьямеддин дада Саниятди ич сюгьбатнаъ.
Гьамусяаьт Мягьямед мектебдин имтигьнарихьна гьязур шула. Гъит дугъаз, спортдиъси, уьмрин вари цирклариъра гъалибвалар гъадагъури гъягъюз Аллагь кюмек ишри. Дугъу кадабгънайи мюгькам рякъюъди хайлин ихь баяр гъягъюра, ва думу рякълан улдугур адар.
