Шарафудин Дашдемиров
Гирами Рамазандин ваз кадабхъну 70 йигълан Гъурбан машкварра магьа дуфну хъубкьра. Аьраб чIалниинди дидиз Ид аль-Адха, яни «гъурбан апIбан машквар» кIура.
Думу гьяж тамам дапIну ккудубкIбахъди аьлакьалу машквар ву. Ид аль-Адха машквар, машквран гъудган ва гьацира хизандин кIулихъ саб хулан гьяйванат гъурбан апIуб гьижрайин кьюдпи йисан ккебгъуб ву, ва гьамус думу мусурмнарин диндин тажрубалу паярикан саб дубхьна. Дидин мяна Ибрагьим пейгъамбарихъди гъабхьи саб гьядисайихъди аьлакьалу ву.
МиржцIурна йирхьуд йисандин яшнаъ ади, Ибрагьим пайгъамбариз сарпи велер гъахьнийи. Му яшнаъди велед дугъмиш хьуб тяжуб шлу ляхин вуйи. Аллагьу Тяаьлайихьан Ибрагьим пейгъамбариз, му Исмяил ччвур туву ялгъуз велед гъурбан апIин кIури, вягь’ю гъафнийи, Багъри велед фукьан ккундушра ва кьаби яшнаъди думу ликриин апIуз чав фукьан жафйир гъизигнушра, Исмяилихъди Аллагьу Тяаьлайин амур кIулиз адабгъбан мясляаьт гъапIнийи. Аллагьдин амриз саб хърахувалра адарди рази гъахьи Исмяилра хъади гъурбан апIру йишв’ина гъафи Ибрагьимдиз сес гъюру (мяна): «Дугъриданна, му увуз аьхю имтигьян гъабхьну. Аллагьдиз вафалувалиинди думу имтигьян тувунва». Гьамци гъурбниз хурайи Исмяил гьяйванатдиинди дигиш гъапIнийи, ва хъасин Ибрагьимдиз сарсана Исхакь ччвур али велед тувнийи.
Гьамдиинди ихь Первердигари улупнуки, Аллагьу Тялайиз багахь хьпан бадали, инсан гъурбан апIуб лазим дар; инсанарин хайирназ гьяйванатар ва жара шей’ар халкь дапIна, гъит дурар гьарсаб чпин улупнайибдиз ишлетмиш апIри, мидихъди сабси инсанди Аллагьди халкь дапIнайидарин варидарин ва табиаьт уьбхбан гъайгъура зигри.
Гъурбан машквран йигъари Аллагьу Тяаьлайин улихь ухьу дапIну ккуни варитIан заан ляхин гъурбан апIурайи гьяйванатдин ифи удубзуб ву. Удубзурайи ифи жилиина хъубкьайизра, думу Аллагьу Тяаьлайи Чан улихь заан дапIну дебккру.
Гьямд ибшри Аллагьу Тааьлайиз, гъи агъзрариинди ихь ватанагьлийир Ислам диндин асас мурхьларикан сабунуб тамам апlуз гьяждиз гъягъру мумкинвалар ачухъ духьнахьуз. Гъит Аллагьу Тааьлайи варидарин чпи гъапlу гьяж, ибадат, дюъйир, гьадму гьисабнаъди гъапIу гъурбан ва туву садакьа кьабул апlри ва хъанара артухъ ужувлан ляхнар апlуз мумкинвалар туври!
«Табасарандин нурар» газатдин редакцияйин терефнаан вари мусурмнар гьаму заан ва гирами Гъурбан машкврахъди кlваантlан тебрик апlурача!
Ккун апlурача Аллагьу Тааьлайикан му жилиин ислагьвал хьуб, бедбахтваларихьан, балйирихьан ухьу уьрхюб.
Варидарин гирами Гъурбан машквар мубарак ибшри!
